Qazaqstan – Frantsııa naryǵyna shıki munaı jetkizetin negizgi memlekettiń biri
Yqpaldastyqty damytýda energetıka sektorynyń áleýeti zor. Memleket basshysynyń aıtýynsha, Qazaqstan – Frantsııa naryǵyna shıki munaı jetkizetin negizgi memlekettiń biri, dep habarlaıdy Kazinform Aqordanyń baspasóz qyzmetine silteme jasap.
Elimiz eksport kólemin arttyrýǵa daıyn. Qasym-Jomart Toqaevtyń pikirinshe, munaı jáne gaz qoryn geologııalyq barlaý, ýran eksporty, jel, kún jáne gıdroenergetıka salalarynda iri jobalardy júzege asyrýǵa múmkindik mol.
«Qazaqstan ýran óndirisi boıynsha álemde birinshi orynda jáne Eýropa tutynatyn ıadrolyq otynnyń tórtten bir bóliginen astamyn qamtamasyz etip otyr. Atom energetıkasy Frantsııanyń energetıka sektorynda 63 paıyzdy quraıdy. Osyǵan oraı yntymaqtastyqty odan ári keńeıtýge orasan zor áleýetimiz bar. Aýaǵa taralatyn kómirtegi shyǵaryndylaryn keleshekte nól deńgeıine jetkizý maqsatyndaǵy múddemiz sáıkes keledi. Frantsııa sııaqty, Qazaqstan da óz aımaǵynda bul sala boıynsha kóshbasshy sanalady. Jańartylatyn energııa kózderine keler bolsaq, jel, kún jáne gıdroenergetıka baǵyttaryndaǵy iri jobalardy júzege asyrý úshin halyqaralyq kóptegen iri kompanııa Qazaqstanǵa kelip jatyr. Jalpy qýaty 1GVt bolatyn jel stantsııasy parkin salý maqsatynda frantsýzdyq Total Energies kompanııasynyń 1,3 mıllıard dollar kóleminde ınvestıtsııa quıýǵa nıet bildirýi – sonyń aıqyn dáleli. «Jasyl» sýtegi salasy da zor áleýetke ıe. Joba tabysty júzege asyrylsa, Qazaqstan eksporttaýshylardyń ondyǵyna kire alady. Biz ómirlik mańyzy bar óndiris, tehnologııa jáne saraptamalyq bilim almasý baǵytyndaǵy yntymaqtastyqty odan ári nyǵaıtýǵa nıettimiz», – dedi Qazaqstan Prezıdenti.
