Qazaqstan Frantsııa jáne Germanııamen sottalǵan azamattardy elge qaıtarý týraly kelisim jasamaq

ASTANA. QazAqparat - Frantsııa men Germanııada jazasyn ótep jatqan qazaqstandyqtar elge qaıtarylýy múmkin. Bul týraly búgin Senat komıtetiniń keńeıtilgen otyrysynan keıin jýrnalısterge suhbat bergen QR Bas prokýrorynyń birinshi orynbasary Iogan Merkel málim etti.

Eske sala keteıik, Konstıtýtsııalyq zańnama, sot júıesi jáne quqyq qorǵaý organdary komıtetiniń otyrysynda «Qazaqstan Respýblıkasy men Ulybrıtanııa jáne Soltústik Irlandııa Qurama Koroldigi arasyndaǵy qylmystyq ister boıynsha ózara quqyqtyq kómek týraly shartty ratıfıkatsııalaý týraly» zań jobasy talqylanǵan bolatyn.

«Osyndaı kelisimder qylmystyq isterdiń barlyq baǵyttary boıynsha jumys isteýge múmkindik beredi. Shart jasalǵan memlekettiń aýmaǵynda adamdardy tergeý qajettiligi týyndaýy múmkin. Budan bólek, shet elderge shyǵarylǵan aktıvterdi qaıtarý ońaılatylady. Buǵan deıin Qazaqstan men Ulybrıtanııa ózara túsinistik negizinde ǵana qarym-qatynas jasap keldi. Degenmen, naqty shart jasalmasa, kez kelgen memleket mundaı kómekti kórsetýge kelise bermeıdi», - deıdi I. Merkel.

Bas prokýror orynbasarynyń aıtýynsha, Qazaqstan men Ulybrıtanııa arasynda buǵan deıin quqyqtyq yntymaqtastyq aıasynda ózara quqyqtyq kómek kórsetý, ekstradıtsııalaý jáne sottalǵandardy berý týraly úsh kelisim jasalǵan. Al aldaǵy ýaqytta Frantsııa jáne Germanııamen dál osyǵan uqsas úsh kelisim jasalatyn bolady. Qazirgi ýaqytta osy baǵytta jumystarmen aınalysatyn saraptamalyq top qurylǵan. Sonymen qatar, Germanııamen de qylmystyq ister boıynsha yntymaqtastyqty keńeıtý kózdeledi.