Qazaqstan-Frantsııa qylmysqa qarsy kúrestegi yntymaqtastyqty kúsheıtedi

ASTANA. QazAqparat – Senattyń jalpy otyrysynda palata depýtattary «Qazaqstan men Frantsııa arasyndaǵy qylmystyq ister boıynsha ózara quqyqtyq kómek týraly shartty ratıfıkatsııalaý týraly» Zańdy maquldady, dep habarlaıdy QazAqparat tilshisi.

«Bul shart ózara quqyqtyq kómektiń negizi men tártibin, olardy júzege asyrý joldaryn, jaýap alý, kúzetpen ustalyp otyrǵan adamdardy ýaqytsha aldyrtý jáne basqa da máselelerdi retteıdi. Naqtyraq aıtqanda, suraý salý, zattardy tárkileý, tintý, saraptama júrgizý, banktegi shottardy anyqtaý, kýáger men sarapshydan jaýap alý, aqparat almasý sııaqty tergeý amaldaryn qamtıdy. Mysaly, Frantsııada tintý júrgizý qajet bolǵanda, bizdiń quqyq qorǵaý organdary suraý joldaıdy. Frantsııanyń tergeý organy óziniń ulttyq zańnamasynyń negizinde tintý júrgizip, sonyń nátıjesin bizge habarlaıdy. Dál osyndaı tártipte Frantsııadan kelip túsken ótinimdi elimizdegi tergeý organdary oryndaıdy», - dedi QR Bas prokýrorynyń orynbasary Áset Shyndalıev.

Sonymen qatar Senat tóraǵasy Máýlen Áshimbaev bul zań eki eldiń qylmysqa qarsy kúrestegi yntymaqtastyǵynyń tıimdiligin arttyratynyn aıtty.

«Maquldanǵan zań Qazaqstan men Frantsııa arasynda qylmystyq ister boıynsha ózara yntymaqtastyqty nyǵaıtý úshin quqyqtyq negiz qalyptastyrady. Soǵan sáıkes Shartta eki eldiń ýákiletti organdary arasynda quqyqtyq kómek kórsetý tártibi aıqyndalǵan. Ózge eldermen osy sıpattaǵy sharttardy jasasý qylmysqa qarsy kúrestiń tıimdiligin arttyra túsedi dep senemiz», – dedi M. Áshimbaev.