Qazaqstan Fızıka olımpıadasynda úzdik 20 eldiń qataryna enýdi josparlaýda - A. Sárinjipov
ASTANA. QazAqparat - Qazaqstan Fızıka olımpıadasynda úzdik 20 eldiń qataryna enýdi josparlaýda. Bul týraly Ortalyq kommýnıkatsııalar qyzmetinde QR Bilim jáne ǵylym mınıstri Aslan Sárinjipov málim etti.
«IPhO-2014 fızıka páni boıynsha 45-shi halyqaralyq oqýshylar olımpıadasy Qazaqstanda ótkeli otyr. Bıyl oǵan qatysatyn elderdiń sany rekordtyq kórsetkishke jetti. Álemniń 85 elinen 700-den astam oqýshy keldi. Olımpıada Nazarbaev Ýnıversıtetinde ótedi. Qazaqstannan 5 oqýshy qatysady", - dep atap ótti ol.
Olımpıadaǵa ulttyq fızıka olımpıadalary jeńimpazdary arasynan mektep túlekteri men mektep bitirý aldyndaǵy synyptardyń oqýshylary qatysady.
Qazaqstan namysyn halyqaralyq olımpıadada mektep oqýshylarynyń Jáýtikov halyqaralyq olımpıadasynyń altyn medal ıegeri, fızıkadan Azııa olımpıadasynyń kúmis júldegeri, fızıkadan halyqaralyq olımpıada kúmis medali men respýblıkalyq pándik olımpıadadaǵy altyn medal ıegeri Ámir Birálın, halyqaralyq Jáýtikov olımpıadasy kúmis medaliniń, respýblıkalyq pán olımpıadasynyń altyn medaliniń ıegeri Isa Danat, respýblıkalyq pán olımpıadasy altyn medaliniń jáne fızıkadan halyqaralyq olımpıadanyń qola medaliniń ıegeri Nurbek Dinmuhammed, «Týımaada» mektep oqýshylary halyqaralyq olımpıadasy qola medaliniń, halyqaralyq Jáýtikov olımpıadasy kúmis medaliniń, fızıkadan Azııa olımpıadasy qurmet gramotasynyń jáne Respýblıkalyq pán olımpıadasy altyn medaliniń ıegeri Tursynbek Nurıslam, jasóspirimder arasyndaǵy jaratylystaný ǵylymdary olımpıadasy men halyqaralyq Jáýtikov olımpıadasy kúmis medaliniń, respýblıkalyq pán olımpıadasy altyn medaliniń ıegeri Dáýlet Qurmantaev qorǵaıdy.
"Qazaqstan atalmysh halyqaralyq olımpıadada óziniń kórsetkishterin jyl ótken saıyn arttyrýda. Bıyl bizde úmit kóp, sebebi óz jerimizde ótip jatqandyqtan, oqýshylar ózderine senimdi bolary sózsiz. Jalpy olımpıadaǵa qatysqan jyldar ishinde Qazaqstannyń qorjynyna 45 medal túsken. Onyń 8-i - altyn, 20-sy - kúmis,17-si - qola. Bizdiń basty básekelesterimiz - Japonııa, Amerıka, Qytaı. Sońǵy kezderi birqatar Azııa elderi de óz deńgeılerin arttyryp keledi. Osy jyly biz ondyqqa enbesek te, úzdik jıyrma eldiń qatarynda bolamyz degen boljam bar", - dedi mınıstr.
