Qazaqstan Fınlıandııamen ózara tıimdi yntymaqtastyqty tereńdetýge nıetti

ASTANA. QazAqparat - Qazaqstan Premer-Mınıstri Álıhan Smaıylov Astanaǵa jumys saparymen kelgen Fınlıandııanyń syrtqy saýda jáne halyqaralyq damýdy qoldaý mınıstri Vılle Skınnarımen kezdesti.

Taraptar saýda, ınvestıtsııa tartý, kólik jáne logıstıka, aýyl sharýashylyǵy, tsıfrlandyrý, bilim berý, tómen kómirtekti damý jáne t. b. salalardaǵy keń aýqymdy máselelerdi talqylady.

Premer-Mınıstr Qazaqstan Fınlıandııany Soltústik Eýropa óńirindegi jáne halyqaralyq uıymdardaǵy negizgi áriptesterdiń biri dep tanıtynyn atap ótti. Osyǵan baılanysty Úkimet barlyq baǵyttar boıynsha ózara tıimdi yntymaqtastyqty tereńdetýge jáne nyǵaıtýǵa nıetti.

«Biz ınvestıtsııalyq yntymaqtastyqty arttyrý men ózara saýda kólemin ulǵaıtýdyń zor múmkindikterin kórip otyrmyz. Osy oraıda Saýda-ekonomıkalyq yntymaqtastyq jónindegi úkimetaralyq komıssııa mańyzdy ról atqarady, ol eki eldiń bıznes-toptary arasyndaǵy dıalog úshin tıimdi platforma bolyp otyr», — dedi Álıhan Smaıylov.

Osy turǵyda Premer-Mınıstr Fınlıandııanyń Astanadaǵy elshiligi janyndaǵy jańa vızalyq ortalyqtyń ashylýyn, sondaı-aq qazaqstandyq jáne fın kompanııalarynyń qatysýymen dóńgelek ústel ótkizý josparlaryn qoldady.

Óz kezeginde Vılle Skınnarı Fınlıandııanyń klımattyq bastamalardy ilgeriletýge, jańartylatyn energetıkany jáne Azııadan Eýropaǵa ótetin perspektıvaly logıstıkalyq dálizderdi, eń aldymen Transkaspıı halyqaralyq kólik baǵytyn damytýǵa múddeli ekenin atap ótti.

Sonymen qatar mınıstr fın bıznesiniń qazaqstandyq naryqqa degen qyzyǵýshylyǵynyń artqanyn, sondaı-aq salalyq yntymaqtastyqty, atap aıtqanda, tsıfrlandyrý jáne bilim berý salalaryndaǵy yntymaqtastyqty nyǵaıtý boıynsha áleýettiń joǵary ekenine toqtaldy.

Kezdesý qorytyndysy boıynsha taraptar qazaq-fın áriptestigin keńeıtý úshin belsendi túrde birlesken jumysty jalǵastyrýǵa daıyn ekenderin rastady.