Qazaqstan Fınlıandııamen yntymaqtastyqty energetıka salasy boıynsha qaı baǵytta órbitpek
ASTANA. KAZINFORM - QR Energetıka mınıstrliginde vıtse-mınıstr Sanjar Jarkeshovtiń Fınlıandııa Ekonomıka jáne eńbek mınıstrliginiń turaqty hatshysy Tımo ıAaatınenmen, sondaı-aq fın kompanııalary — EastCham Finland, Wärtsilä, Finnvera jáne Nurminen Logistics ókilderimen kezdesý ótti.
QR Energetıka mınıstrligi baspasóz qyzmetiniń habarlaýynsha, kelissóz barysynda taraptar energetıka salasyndaǵy qazaqstan-fın yntymaqtastyǵynyń ózekti máselelerin jáne birlesken ınvestıtsııalyq jáne ınnovatsııalyq jobalardy iske asyrýdyń perspektıvalaryn talqylady.
Vıtse-mınıstr atap ótkendeı, Qazaqstan Fınlıandııamen energetıka salasyndaǵy seriktestikti damytýǵa erekshe mán beredi jáne ózara is-qımyldy tereńdetýge, ozyq tájirıbemen almasýǵa, sondaı-aq turaqty energetıkalyq jobalarǵa ınvestıtsııa tartýǵa daıyn.
Kezdesý barysynda jańartylatyn energııa kózderin damytý, energııa tıimdiligin arttyrý jáne energetıkalyq ınfraqurylymdy jańǵyrtý máselelerine erekshe nazar aýdaryldy. Energetıka mınıstrligi fındik «Wärtsilä» kompanııasymen yntymaqtastyq tájirıbesine ıe jáne bul baǵyttaǵy ózara is-qımyldy odan ári damytýǵa múddeli. Taraptar sondaı-aq «jasyl» transformatsııa men dekarbonızatsııa salasyndaǵy birlesken jobalarǵa qyzyǵýshylyq tanytty. Bul Qazaqstannyń 2060 jylǵa qaraı kómirtegi beıtaraptyǵyna qol jetkizý jónindegi ulttyq basymdyqtaryna sáıkes keledi.
Kezdesý barysynda Qazaqstan men Fınlıandııa mınıstrlikteri arasynda Fınlıandııa Prezıdentiniń Qazaqstanǵa resmı sapary aıasynda qol qoıylǵan energetıka salasyndaǵy Memorandýmnyń iske asyrylýy talqylandy.
Qoıylǵan mindetterdi praktıkalyq turǵyda júzege asyrý maqsatynda ekijaqty jumys toby quryldy. Onyń alǵashqy otyrysy ótken jyly ótken bolatyn. Bıyl naqty jobalar men ózara is-qımyl tetikterin talqylaýǵa arnalǵan kelesi otyrys ótkizý josparlanýda.
Kelissózder qorytyndysy boıynsha taraptar ótken kezdesý ózara túsinistikti nyǵaıtýǵa jáne Qazaqstan men Fınlıandııa Respýblıkasynyń energetıka salasyndaǵy yntymaqtastyǵyn odan ári damytýǵa berik negiz bolatynyna senim bildirdi.
Aıta keteıik, Fınlıandııa prezıdentiniń Qazaqstanǵa resmı sapary barysynda 15 qujatqa qol qoıyldy.