Qazaqstan Fınlıandııamen dostyq qarym-qatynasqa basa mán beredi – Prezıdent
ASTANA. KAZINFORM — Qazaqstan men Fınlıandııa prezıdentteriniń kelissózi eki el delegatsııalarynyń qatysýymen odan ary jalǵasty. Bul týraly Aqordanyń baspasóz qyzmeti habarlady.
Prezıdenttiń aıtýynsha, Fınlıandııa Qazaqstannyń Soltústik Eýropa men Eýropa Odaǵyndaǵy basty saýda seriktesi sanalady.
Memleket basshysy Fınlıandııanyń taza energetıka, tehnologııa, tsıfrlyq ınnovatsııa, ekologııalyq jaýapkershilik, basqarý, bilim berý jáne adam kapıtaly baǵyttaryndaǵy joǵary standarttary álemdik deńgeıde moıyndalǵanyn atap ótti.
Atalǵan salalardaǵy Fınlıandııanyń jetistikteri kóptegen elge, sonyń ishinde Qazaqstanǵa da úlgi.
– Sizdiń basshylyǵyńyzben Fınlıandııa Eýropada, sondaı-aq álemde syndarly ról atqarady. Memlekettik ustanymyńyz ben qundylyqtarǵa beriktigińiz Fınlıandııany dúnıe júzine úlgili el retinde tanytyp otyr. Biz muny joǵary baǵalaımyz. Qazaqstan Fınlıandııamen dostyq qarym-qatynasqa basa mán beredi. Buǵan deıin qol jetkizilgen ýaǵdalastyqtardy iske asyrýǵa, yntymaqtastyqtyń jańa baǵyttaryn damytýǵa ázirmiz, - dedi Qasym-Jomart Toqaev.
Memleket basshysynyń pikirinshe, saýda-ekonomıkalyq yntymaqtastyqty odan ári damytýǵa mol múmkindik bar. Bul rette Úkimetaralyq komıssııasynyń jumysy mańyzdy ról atqarady.
Prezıdent fın delegatsııasynyń quramynda bıznes ókilderiniń bolýy Helsınkıdiń ózara seriktestikti tereńdetýge shynaıy múddeli ekenin kórsetedi dep sanaıdy.
Elimiz Fınlıandııa kompanııalarymen birlesken jobalardyń júzege asyrylýyna jan-jaqty qoldaý kórsetýge daıyn. Qasym-Jomart Toqaev fın bıznesmenderin Ortalyq Azııanyń keń naryǵyna shyǵý úshin Qazaqstanda shetel ınvestorlaryna jasalatyn qolaıly jaǵdaıdy paıdalanýǵa shaqyrdy.
Aleksandr Stýbb fın kompanııalary Qazaqstan naryǵyndaǵy qyzmetin keńeıtýge múddeli ekenin jetkizdi.
– Búgingi kezdesýlerge daıyndyq barysynda delegatsııadaǵy kásipkerlerdiń biri «Qazaqstandaǵy ózgeristiń bári jedel júrip jatqanyn túsiný kerek. Sondyqtan baıaý qımyldap, bıýrokratııaǵa jol berýge bolmaıdy» dedi. Bul damýdyń dańǵylyna túsken elderimiz úshin qýanarlyq jaǵdaı, - dedi Fınlıandııa prezıdenti.
Sondaı-aq taraptar óńirlik jáne halyqaralyq kún tártibiniń ózekti máseleleri jóninde pikir almasty.