Qazaqstan fermerlerinen astyq satyp alý tártibi ózgerdi - Azyq-túlik korporatsııasy
ASTANA. QazAqparat - «Azyq-túlik kelisimshart korporatsııasy» UK» AQ aýyl sharýashylyq taýarlaryn óndirýshilerden astyqty satyp alý erejeleriniń ózgergenin málimdedi, dep habarlaıdy QazAqparat mekemeniń baspasóz qyzmetine silteme jasap.
«Azyq-túlik kelisimshart korporatsııasy» fermerlerge qoldaý kórsetýdi jedeldetý úshin astyqty satyp alýdyń belgili bir sharttarynan bas tartý týraly sheshim qabyldady», - delingen habarlamada.
Atap aıtqanda, «Azyq-túlik kelisim shart korporatsııasy» «QazAgro» holdıngi men QR Aýyl sharýashylyǵy mınıstrliginiń maquldaýymen astyqty satyp alý shartyna mynadaı ózgerister engizdi: astyqty saqtaý qyzmetine 3 aı aldyn ala tóleý sharty alynyp tastaldy (buryn tólengen ótinimder boıynsha jumsalǵan qarajattardyń orny óteledi) jáne bir astyq óndirýshige arnalǵan kvotalar joıylyp, egistik alańdary ǵarysh sýretteriniń kómegimen tekserilmeıdi.
Bıdaı egistikteri týraly aqparattardyń senimdiligine ótinim berýshiler men oblystyq ákimdik janyndaǵy satyp alý máseleleri boıynsha komıssııa jaýap beredi.
Eske sala ketsek, 2017 jyly jeltoqsan aıynyń sońynda «Azyq-túlik kelisim shart korporatsııasy» UK» AQ tonnasyna 42 myń teńge baǵamen 2 mln. tonna 3 sanattaǵy bıdaıdy satyp alǵandyǵyn habarlady.
Satyp alý astyq qolhattarynyń aqparattyq júıesi arqyly (www.minagro.kz ınternet-resýrsy) jáne egis alqabynyń 1 gektaryna 173 keli mólsherindegi kvota boıynsha júzege asyrylǵan. Bul kvota jerge jáne naqty bıdaı daqyldaryna baılanysty aýyl sharýashylyǵy taýaryn óndirýshiler úshin astyq satý kólemin ádil anyqtaý úshin belgilengen. Birinshi kezeńge ótinimder 25 qańtarǵa deıin qabyldandy.
Sonymen birge, korporatsııa birqatar oblysta ákimdikterdiń ótinishine sáıkes, sharýalardyń astyqty belgilengen kvotalardan asatyn mólsherde sata alatynyn málimdedi.
