Qazaqstan fermerleri egis naýqanyna qajet tuqymmen tolyq qamtamasyz etildi
ASTANA. QazAqparat - Búginde elimizdiń barlyq aýyl sharýashylyǵy taýarlaryn óndirýshiler tuqymmen qamtamasyz etilgen. Bul týraly búgin Ortalyq kommýnıkatsııalar qyzmetindegi brıfıngte QR Aýyl sharýashylyǵy vıtse-mınıstri Saparhan Omarov málim etti.
«Oblystyq aýyl sharýashylyǵy basqarmalarynyń derekteri boıynsha, 2015 jylǵy ónimge 2,2 mln. tonna tuqym saqtaldy, bul qajettiliktiń 94 paıyzyn quraıdy. Atap aıtqanda, onyń ishinde astyq daqyldarynyń tuqymy 1,9 mln. tonna, maıly daqyldar 50,4 myń tonna, jem-shóp - 29,4 myń tonnany qurady»,-dedi ol.
Mınıstrliktiń málimetine qaraǵanda, bul rette Aqtóbe, Batys Qazaqstan, Qostanaı jáne Soltústik Qazaqstan oblystarynda 162,5 myń. tonna kóleminde dándi daqyldar tuqymynyń tapshylyǵy boldy.
Atalǵan tapshylyq oblysishilik, oblysaralyq almasý jáne bıdaıdy forvardtyq satyp alý baǵdarlamasy esebinen 100 paıyzǵa toltyryldy. Bıylǵy 10 naýryzdaǵy jaǵdaı boıynsha Kazagreks fılıaldaryna 1,4 mln. tonna dándi daqyldar tuqymy tekserýge túsip, 1,3 mln. tonnasy nemese 89 paıyzy tekserildi. Onyń 1,2 mln. tonnasy nemese tekserilgenniń 96 paıyzy sapaly bolyp shyqty.
