Qazaqstan fermerleri dızel otynynyń qymbattaıtynyna alańdaýly
Buǵan deıin «arzandatylǵan» janar-jaǵarmaıdyń bir tonnasy 127 000 teńge bolsa, mamyr aıynda munaı óńdeý zaýytynda onyń baǵasy 130 000 teńgege deıin ósýi múmkin, dep habarlaıdy QazAqparat tilshisi.
«Demek, dızeldik otynnyń jańa baǵasy bir lıtri úshin 107,5 teńgeni quraıdy. Alaıda bul - zaýyttaǵy baǵa, ony áli aımaqtarǵa jetkizý kerek. Sol kezde janar-jaǵarmaıdyń baǵasy 123 teńgeden asyp ketedi. Operatorlar ol baǵanyń ishine san alýan shyǵyndardy, tipti nesıelerdi jabýǵa qajetti qarajatty da kirgizip qoıady», - delingen Qazaqstan fermerleri odaǵynyń resmı habarlamasynda.
Oǵan sáıkes, 28 sáýir kúni QR Energetıka mınıstrliginde ótken keńeste kóktemgi egis jumystaryna arnalǵan janar-jaǵarmaıdyń baǵasyn kóterý týraly sheshim qabyldandy. Sol jınalystyń hattamasynda «arzandatylǵan» dızeldik otynnyń bir tonnasyn 130 000 teńgege deıin kóterý jaıynda jazylǵan. Alaıda jańa baǵanyń qalaı engiziletini belgisiz. Sebebi dızeldik otyndy jetkizý týraly kelisimderdiń bári rásimdelgen.
«Bálkim, jańa baǵany qosymsha kelisimsharttar arqyly engizedi. Sol sebepti ondaı qujattarǵa qol qoıý qajet dese, dıqanshylarǵa oǵan kelispeýge keńes beremiz. Áıtpese, dızeldik otyn úshin jańa baǵamen tóleýge týra keledi», - deıdi Qazaqstan fermerleri odaǵynyń zańgeri Erlan Ospanov.
Uıym QR Aýyl sharýashylyǵy mınıstrligi men Ulttyq kásipkerler palatasynyń kómegine senip otyr.
Aıta keteıik, 18 sáýir kúni ótken Úkimet otyrysynda QR Energetıka mınıstri Qanat Bozymbaev mamyr aıynda janar-jaǵarmaı baǵasy ózgerýi múmkindigin aıtqan edi . «Bıylǵy kóktemgi egis jumystaryn ótkizý úshin dızeldik otyn tonnasynyń baǵasy 127 myń teńge. Bir lıtri 105,4 teńgeden. Tasymaldaý, saqtaý jáne jetkizý shyǵyndaryn esepke alǵanda dızeldik otynnyń baǵasy lıtrine 117-126 teńgeni qurap otyr. Mamyr aıynan bastap baǵalar ózgerýi múmkin. Sondyqtan osy múmkindikti paıdalanyp, oblys ákimderine bir ótinish aıtqym kelip otyr, bul máseleni qatań baqylaýǵa alyp, tıisti sharalardy qabyldaý kerek», - dedi Bozymbaev.
