Qazaqstan fermerler odaǵy tiri mal eksportyna tyıym salýǵa qatysty pikir bildirdi

NUR-SULTAN. QazAqparat - QR Aýyl sharýashylyǵy mınıstrimen ótken kezdesýde «Qazaqstan fermerler odaǵy» respýblıkalyq qoǵamdyq birlestiginiń músheleri tiri maldyń eksportyna tyıym salý merzimin 6 aı emes 60 aıǵa deıin uzartýdy usyndy, dep habarlaıdy QazAqparat QR AShM baspasóz qyzmetine silteme jasap.

Jıyn barysynda Saparhan Omarov fermerler odaǵynyń prezıdenti bolyp saılanǵan Jıgýlı Daırabaevty quttyqtady. Sondaı-aq, mınıstr buǵan deıin QFO músheleriniń kópshiligimen dástúrli senbilik kezdesýlerde jolyqqanyn aıtty. Ol bul tolyq quramdaǵy alǵashqy kezdesý ekenin atap ótti.

QFO músheleri QR AShM mınıstrine aýyl sharýashylyǵynyń barlyq ózekti máseleleri týraly ashyq aıtty. Onyń ishinde gerbıtsıdterge sýbsıdııa alý máseleleri, sondaı-aq sútti jáne etti mal sharýashylyǵyndaǵy qazirgi jaǵdaı da keńinen talqylandy.

Atap aıtqanda, fermerler «Mal sharýashylyǵyn damytý» baǵdarlamasynda olqylyqtar jiberilgenin alǵa tartty. Olardyń pikirinshe, mal basyn kóbeıtý úshin «angýs» tuqymynyń ımportyna basa nazar aýdarylǵany qatelik. Sebebi, belgııalyq sıyrlardyń kórsetkishteri álde qaıda joǵary: buqa men sıyrdyń tiri salmaǵy aıtarlyqtaı kóp, soıylǵan kezde 80%-ǵa jýyq, al angýs 65%-ǵa jýyq et beredi. Sonymen qatar, angýsqa qaraǵanda sútti eken.

Sonymen qatar, Qazaqstan fermerler odaǵynyń ókilderi QR Aýyl sharýashylyǵy mınıstrligi tiri maldyń eksportyna 6 aılyq moratorıı jarııalaýyna qatysty oılaryn ortaǵa saldy. Fermerler tolyqtaı QR AShM sheshimin qoldaıdy. Sondaı-aq, QFO keıbir músheleri tyıym salý merzimin 5 jylǵa deıin ulǵaıtýdy usyndy.
Fermerler kótergen máseler boıynsha QR AShM basshysy mınıstrliktiń 2017-2021 jyldarǵa arnalǵan AÓK damytý memlekettik baǵdarlamasyn iske asyrý aıasynda júıeli máselelerdi sheshý boıynsha josparly túrde jumys istep jatqanyn atap ótti. Sońǵy jyly osy baǵytta eleýli qadamdar jasaldy.

Atap aıtqanda, salanyń jumysyn tıimdi jáne qazirgi zamanǵa saı, al onyń erejeleri taza jáne barshaǵa túsinikti etetin zańnamaǵa eleýli túzetýler engizildi. Budan basqa, jer paıdalanýdyń tıimdiligin arttyrýǵa baǵyttalǵan jańa ózgerister ázirlenýde.

Jıyn sońynda Saparhan Omarov birlestik ókilderimen únemi kezdesý ótkizýge ýáde berdi. Ýaqytty únemdeý úshin úshin beınekonferentsııa arqyly kezdesý ótkizýdi usyndy.

«Búgingi bizdiń kezdesýimiz jemisti de, jeńisti jumystardyń bastamasy. Іsimiz ilgeri basýy úshin, qordalanǵan máselerdi ortaǵa salyp talqylap, tıimdi sheshý joldaryn usynýymyz qajet. Sondyqtan ashyq piákir almasý arqyly birigip jumys isteýge shaqyramyn», - dep atap ótti Saparhan Omarov.