Qazaqstan farmatsevtıkasyna 390 mlrd teńge quıylmaq: Pfizer men AstraZeneca bastaǵan alpaýyttar iske kiristi

ASTANA. KAZINFORM — Qazaqstanda farmatsevtıka óndirisin damytýǵa 390 mlrd teńgeden astam ınvestıtsııa tartý kózdelip otyr. Pfizer, AstraZeneca jáne Johnson & Johnson kompanııalary dári-dármek óndirisin lokalızatsııalaý, zamanaýı preparattardyń qoljetimdiligin arttyrý jóninde usynystaryn jetkizdi. Bul týraly Úkimet málim etti.

Qazaqstan farmatsevtıkasyna 390 mlrd teńge quıylmaq: Pfizer men AstraZeneca bastaǵan alpaýyttar iske kiristi
Foto: Úkimet

Qazaqstan Respýblıkasynyń Premer-mınıstri Oljas Bektenov Investıtsııalyq ahýaldy jaqsartý jónindegi keńestiń otyrysyn ótkizdi. Onda densaýlyq saqtaý salasyna ınvestıtsııa tartý jáne ınnovatsııalar engizý máseleleri qaraldy. Dárilik zattar óndirisin keńeıtý, zamanaýı emdeý ádisteriniń qoljetimdiligin arttyrý jáne ınvestorlar úshin jaǵdaılardy jetildirý máseleleri talqylandy.

Premer-mınıstr ult densaýlyǵyn saqtaý máselesi Konstıtýtsııada alǵash ret bekitilgenin atap ótti.

— Jýyrda Memleket basshysy Qazaqstan halqyna Joldaýynda jeke kapıtaldy tarta otyryp, medıtsınalyq nysandar qurylysyn ozyq qarqynmen júrgizý mindetin qoıdy. Úkimet osy maqsattarǵa qol jetkizý úshin 2029 jylǵa deıingi densaýlyq saqtaýdy damytý tujyrymdamasyn jáne 2024-2030 jyldarǵa arnalǵan densaýlyq saqtaý ınfraqurylymyn damytý tujyrymdamasyn júzege asyrýda. Bul strategııalyq qujattar medıtsınalyq kómekti jetildirýdi, ınnovatsııalyq tehnologııalardy engizýdi jáne dári-dármekpen qamtamasyz etý júıesin nyǵaıtýdy kózdeıdi, — dep atap ótti Oljas Bektenov.

Qabyldanyp jatqan sharalar oń nátıjesin berip otyr. Kútiletin ómir súrý uzaqtyǵy 76 jylǵa jýyqtady. «Aýylda densaýlyq saqtaýdy jańǵyrtý» jobasy aıasynda 1 mln-ǵa jýyq azamat medıtsınalyq qyzmetterge qol jetkizdi. Sońǵy úsh jylda óńirlerde 800-den astam densaýlyq saqtaý nysany salyndy, aldaǵy ýaqytta taǵy 70 nysan salý josparlanyp otyr. Sheteldik ınvestorlar men halyqaralyq qarjy uıymdarynyń qatysýymen kópsalaly, ýnıversıtettik jáne balalar aýrýhanalaryn salý jobalary júzege asyrylyp jatyr.

Farmatsevtıka salasyn damytýǵa da basa nazar aýdarylýda. Ótken jyldyń qorytyndysy boıynsha mundaǵy naryq kólemi 1,2 trln teńgeden asyp, 31%-ǵa ósti. 390 mlrd teńgeden astam somaǵa 500-ge jýyq dári-dármek ataýyn shyǵarýǵa jáne jańa jumys oryndaryn qurýǵa baǵyttalǵan segiz iri ınvestıtsııalyq joba pysyqtalýda. Sáýir aıynda Qazaqstan TMD elderi arasynda birinshi bolyp DDU ádisnamasy boıynsha Ulttyq retteý júıesiniń úshinshi jetilý deńgeıine jetti jáne «biryńǵaı tereze» qaǵıdatyn engizdi. Sondaı-aq joǵary standarttarǵa ıe elderden keletin preparattardy tirkeýdiń 15 jumys kúni ishinde júzege asatyn jedeldetilgen rásimi engizildi.

Halyqaralyq iskerlik qoǵamdastyq atynan bıznestiń usynystaryn Qazaqstandaǵy Amerıkalyq saýda palatasynyń (AmCham) atqarýshy dırektory Djeff Erlıh, AQSh-tyń Qazaqstandaǵy elshisi Djýlı Stafft, «Johnson & Johnson Kazakhstan» JShS bas dırektory Ádilet Nazarbaev, AstraZeneca Kazakhstan bas dırektory Elena Trogova, Pfizer kompanııasynyń Qazaqstan, Ortalyq Azııa, Kavkaz jáne Mońǵolııa boıynsha óńirlik dırektory, AmCham Dırektorlar keńesiniń múshesi Dmıtrıı Kozenkov jetkizdi.

AQSh-tyń Qazaqstandaǵy elshisi Djýlı Stafft densaýlyq saqtaý jáne farmatsevtıka salasyndaǵy turaqty jáne boljamdy ınvestıtsııalyq ahýaldyń mańyzdylyǵyn atap ótti. Dári-dármekpen qamtamasyz etýdiń qoljetimdiligin arttyrý máseleleri de qozǵaldy.

Johnson & Johnson Kazakhstan kompanııasynyń bas dırektory Ádilet Nazarbaev dárilik zattardy memlekettik ótemaqy tizbesine engizý tetikterin jetildirý jáne densaýlyq saqtaýdy qarjylandyrýdy kezeń-kezeńimen ulǵaıtý máselelerin kóterdi. Em alýshylardyń zamanaýı preparattarǵa qol jetkizýiniń jáne halyqtyń ósip kele jatqan qajettilikterin eskere otyryp, densaýlyq saqtaý júıesin turaqty qarjylandyrýdy qamtamasyz etýdiń mańyzdylyǵy atap ótildi.

AstraZeneca Kazakhstan kompanııasynyń bas dırektory Elena Trogova sırek kezdesetin aýrýlary bar patsıentterdi qajetti dárilik preparattarmen qamtamasyz etý máselelerin kóterdi. Em alýshylarǵa emdeýdiń úzdiksizdigin qamtamasyz etý maqsatynda osyndaı dárilik preparattardyń tizbesin qalyptastyrý tásilderin jetildirý máselelerine nazar aýdaryldy.

«Pfizer» kompanııasynyń Qazaqstan, Ortalyq Azııa, Kavkaz jáne Mońǵolııa boıynsha óńirlik dırektory Dmıtrıı Kozenkov farmatsevtıka salasyn damytýdyń basym baǵyttaryn aıqyndady. Atap aıtqanda, óndiristerdi lokalızatsııalaý, ıntellektýaldy menshikti qorǵaý jáne boljamdy retteýshi ortany damytý boıynsha odan ári jumysqa basa mán berildi.

Kóterilgen máseleler boıynsha Premer-mınıstrdiń orynbasary – ulttyq ekonomıka mınıstri Serik Jumanǵarın, densaýlyq saqtaý mınıstri Aqmaral Álnazarova pikir bildirdi.

Otyrys qorytyndysy boıynsha Oljas Bektenov jaýapty memlekettik organdarǵa halyqaralyq farmatsevtıkalyq kompanııalardyń usynystaryn naqty qaraýdy jáne saladaǵy ınvestıtsııalyq ahýaldy odan ári jaqsartý jónindegi sharalardy pysyqtaýdy tapsyrdy. Investıtsııalardy tartýǵa, dárilik zattar óndirisin lokalızatsııalaýǵa, ozyq tehnologııalardy engizýge jáne halyqqa sapaly medıtsınalyq kómektiń qoljetimdiligin arttyrýǵa erekshe nazar aýdaryldy.