Qazaqstan EYDU táýekel reıtıngindegi ornyn jaqsartty
ASTANA. QazAqparat - EYDU Saýda jáne aýyl sharýashylyǵy dırektoratynyń Eksporttyq kredıtter men kredıttik kepildikter jónindegi jumys toby turaqty negizde júrgizetin eldik táýekel reıtınginde Qazaqstan besinshi topqa kóterildi. Osy halyqaralyq qurylymda elimizdi «KazakhExport» kompanııasy («Báıterek» holdınginiń enshiles uıymy) tanystyrady, dep habarlaıdy QazAqparat.
Ekonomıkalyq yntymaqtastyq jáne damý uıymy (EYDU) álemniń barlyq elderin táýekeldiń 8 sanaty boıynsha saralaıdy. Olar úsh kórsetkish: tólem júrgizý tájirıbesi, eldiń qarjylyq jáne ekonomıkalyq jaǵdaıy negizindegi taldaýdyń kredıttik táýekel baǵasyna baılanysty bólinedi. EYDU-nyń Eksporttyq kredıtter men kredıttik kepildikter jónindegi jumys toby júrgizetin osy taldaý kez kelgen memlekettiń kez kelgen menshik nysanyndaǵy kásiporyndary men memlekettik organdaryn eksporttyq-kredıttik agenttikter resýrstarynyń esebinen qarjylandyrý qunyn anyqtaıdy. Qazaqstan alǵash ret osy top otyrysyna 2017 jyldyń qarasha aıynda qatysty. Sol kezde bizdiń elimiz tek altynshy topqa kiretin.
Búgingi kúni elimizdiń ókili retinde KazakhExport EYDU múshelerin óziniń qarjylyq quraldary, kórsetkishteri men damý keleshegi negizindegi Qazaqstannyń eksporttyq áleýetimen turaqty túrde tanystyrady. Sondaı-aq kompanııa halyqaralyq áriptesterine elimizdegi eksporttyq saıasatty memlekettik qoldaý sharalary, qarjylyq jáne ınstıtýtsıonaldy quraldar men Qazaqstan Respýblıkasynyń 2022 jylǵa deıingi Ulttyq eksporttyq strategııasynyń erejeleri jóninde aqparat berip otyrady.
Buǵan qosa, KazakhExport áleýetti túrde reıtıngti joǵarylatý týraly keńes bere alatyn EYDU-nyń jetekshi elderiniń ókilderimen birqatar kelissózder júrgizip, kompanııanyń halyqaralyq standarttardy, Qazaqstan Respýblıkasynyń qarjy-saqtandyrý salasyndaǵy protsedýralar men usynystardy engizý talpynystary jónindegi prezentatsııalyq materıaldarymen tanystyrdy.
Osy reıtıngtegi ornynyń jaqsarýy Qazaqstannyń qarjylyq turaqtylyǵynyń nyǵaıýy týraly aqparatty EYDU qatysýshy - elderiniń durys qabyldaǵandyǵyn, sondaı-aq bank sektorynyń damyýyn jáne qarjylyq mindettemelerdi oryndaý jónindegi halyqaralyq áriptes retinde bizdiń memlekettiń senimdilik mártebesiniń kóterilýin kórsetedi.
«KazakhExport» eksporttyq saqtandyrý kompanııasy» AQ - «Báıterek» holdınginiń enshiles kompanııasy. KazakhExport ekonomıkanyń basym sektorlarynda shıkizattyq emes taýarlar, jumystar, qyzmetter eksportynyń ósýin qoldaýmen jáne qazaqstandyq kásiporyndarǵa qarjylaı-saqtandyrý jáne qarjylaı emes qoldaý praktıkasyn qalyptastyrýmen aınalysady. «KazakhExport» ESK» AQ 2023 jylǵa paıymy - Qazaqstan Respýblıkasynyń Ortalyq Azııa aımaǵyndaǵy jáne Eýrazııalyq ekonomıkalyq odaq elderindegi memlekettik syrtqy ekonomıkalyq saıasatyn iske asyrýdaǵy negizgi damý ınstıtýty ataný. Ónimder eksporty salasyndaǵy memlekettik qoldaý quraldarymen keg.kz saıtynda tolyǵyraq tanysýǵa bolady.
