Qazaqstan EYDU Investıtsııa jónindegi komıtetine múshe boldy
Shara barysynda QR Investıtsııalar jáne damý vıtse-mınıstri Erlan Haırov sarapshylar tobynyń ekinshi sholýdy daıyndaý kezindegi aıryqsha úlesin atap ótip, olardyń qajyrly eńbekteri, sondaı-aq Qazaqstanǵa kórsetken erekshe qoldaýy úshin alǵys aıtty.
«Investıtsııa úshin básekelestik eshqashan toqtamaıdy, bizdiń mindet osy kúreste árqashan da alda bolý. Sondyqtan, biz atalǵan usynystardy joǵary baǵalaımyz jáne ony sapaly engizý Qazaqstan ekonomıkasyn nyǵaıtý protsesinde óte mańyzdy. Qazaqstannyń ınvestıtsııalyq ahýalyn jaqsartýǵa qosqan úlesterińiz ben paıdaly usynystaryńyz jáne jemisti eńbekterińiz úshin EYDU Hatshylyǵyna jáne áriptesterge alǵys bildiremin», - dep atap ótti Erlan Haırov.
Qazaqstan sońǵy 5 jylda EYDU sarapshylarymen birge eldegi ınvestıtsııalyq ahýaldy jaqsartý boıynsha aýqymdy jumystar atqardy. Ákimshilik kedergiler joıylyp, ınvestorlardy yntalandyrýdyń tyń sharalary engizildi. Azamattary Qazaqstanǵa vızasyz kelip-ketetin elderdiń tizimi keńeıtildi. Bıyl 1 qańtardan bastap ondaı elderdiń sany 56 boldy. Sondaı-aq, sheteldik jumysshy kúshterin tartý jaǵdaıy jetildirilip, Joǵarǵy sot janynan ınvestıtsııalyq daýlardy qaraıtyn mamandandyrylǵan sot alqasy quryldy.
Azamattyq qoǵam men ınvestorlar arasynda keri baılanys ornatý maqsatynda bıznesti engizýge jaýapty Ulttyq baılanys ortalyǵy quryldy.
EYDU usynystaryna sáıkes, Dúnıejúzilik bankpen birge Investıtsııa tartý jónindegi Ulttyq strategııa ázirlendi. Strategııa EYDU jańa usynys paketterine sáıkes, ınvestıtsııa tartýdyń jáne ınvestıtsııalyq ahýaldy jaqsartýdyń naqty mehanızmderin anyqtaıdy.
«Investıtsııalyq ahýaldy jaqsartý jónindegi jumystar munymen toqtamaıdy. Biz Qazaqstannyń ınvestıtsııalyq ahýalyn EYDU-na múshe elderdiń aldyńǵy qatarly standarttaryna sáıkestendirý úshin barlyq kúsh-jigerimizdi salamyz», - dep atap ótti vıtse-mınıstr.