«Qazaqstan - Eýropanyń bolashaǵy ma?» - respýblıkalyq basylymdarǵa sholý

Qazaqstan Respýblıkasy Ulttyq bankiniń baspasóz qyzmeti taratqan málimetke qaraǵanda, memleketimizdiń aqshasy - teńge úshin jańa valıýtalyq dáliz jasalmaq kórinedi. Onyń ornatylý jáne qoldanysta bolý merzimi 2010 jylǵy aqpannyń 5-i jáne 2011 jylǵy naýryzdyń 20-sy aralyǵymen shektelmek. Bul jaıynda «Ekonomıka» gazetiniń búgingi sanynda jarııalanǵan «Teńgege endi kóbirek erkindik berilmekshi» atty maqalada egjeı-tegjeıli baıandalǵan. Basylymnyń jazýynsha, bedeldi Gellap ınstıtýty júrgizgen saýalnama nátıjelerine qaraǵanda, Qazaqstan azamattarynyń 41 paıyzy jergilikti valıýtany, ıaǵnı teńgeni, 12 paıyzy dollardy jáne taǵy da 12 paıyzy eýrony aqsha salyp saqtaýǵa eń paıdaly jáne qaýipsiz dep esepteıtin kórinedi.

Beısenbi kúni jaryq kórgen «Ekonomıka» basylymy «Bıylǵy 2010 jyldyń da ońaı jyl bolmaıtyny belgili. Ótken jyly qolǵa alynǵan baǵdarlamalar, joba-josparlar osy jyly da jalǵasyn tappaqshy. Otandyq ekonomıka ónerkásip ónimdiligin tómendetpeýge, shaǵyn jáne orta kásipkerlikti jandandyrýǵa, bankterdiń belsendi áreketin damytýǵa jumys isteýi tıis. Sonymen, 2010 jyl ekonomıkada qandaı jyl bolmaq», deı kele elimizdiń bilikti ekonomıst mamandarynyń pikirin beripti. Máselen, akademık Orazáli Sábden «Ulttyq ekonomıkamyzdyń negizgi túıtkili - áli kúnge deıin bizdiń elimizdiń shıkizat qorynyń eksportyna táýeldiligi. Sońǵy jyldary elimizde óndiristi ár taraptandyrý baǵyty tańdap alyndy. Innovatsııa engizý, qaıta óńdeý ónerkásibin damytý, qyzmet kórsetý, kólik salasyn damytýǵa bet bura bastadyq. Deıturǵanmen, ekonomıkadaǵy asa mańyzdy sala, basty roldegi «keıipker» munaı-gaz jáne metall, sodan keıin astyq eksporty ekeni ótirik emes. Álemdik qarjy daǵdarysy saldarynan qazaqstandyq shıkizat eksportyna suranys azaıdy ári eksportqa shyǵaryp otyrǵan shıkizattyń álemdik baǵasy quldyrady», degen pikir bildirgen.

«Egemen el tarıhyn baısaldy da baıypty qadammen attaǵan Barys jyly ekonomıkamyz ben áleýmettik ómirimizdegi oń ózgeristerdi odan ári tereńdetip, jańa bastamalar men baǵdarlamalarǵa jol ashpaqshy. Halyq sharýashylyǵyn sony soqpaq - ındýstrııalandyrý jáne ártaraptandyrý jolyna baǵyttaı otyryp, Úkimet qordalanyp qalǵan problemalar túıinin sheshýge umtylyp otyr. Bul oraıda Elbasymyzdyń usynysy boıynsha ústimizdegi jylǵy qańtardan bastap ómirge joldama alǵaly otyrǵan Kedendik odaqtyń kóterer júgi qomaqty», dep jazady «Ekonomıka» gazeti. Atalǵan maqala basylymnyń búgingi sanynda «Barys jyly - tabys jyly bolmaq» degen taqyryppen jarııalanǵan.

«Qańtar aıynyń basynda Frantsııanyń syrtqy saıası jáne saraptamalyq jýrnaldarynyń biri «L'Essentiel des relations internationales» «Qazaqstan - Eýropanyń bolashaǵy ma?» degen taqyryppen Qazaqstan týraly 100 bettik áserli reportaj jarııalady. Onyń syrtqy muqabasynda Prezıdent Nursultan Nazarbaevtyń sýreti men «Qazaqstan 2010 jyly EQYU basshylyǵynda» degen jazý bar», dep jazady «Kazahstanskaıa pravda» gazeti.

Basylym atalǵan jýrnalda jaryq kórgen maqaladan úzindi keltirgen. Onda «2010 jyl Qazaqstan jyly bolmaq. Eýrazııadan jáne burynǵy Keńes Odaǵynan osyndaı mártebege eń birinshi ıe bolǵan bul el jyl boıy Eýropadaǵy qaýipsizdik jáne ynqtymaqtastyq uıymyna basshylyq jasaıdy. Bul bılik basynda 20 jylǵa jýyq bolǵan ózderiniń Prezıdenti qalyptastyrǵan úlgili memleket qaqtyǵystardy retteý máselelerinde oılanyp-tolǵaný úshin eýropalyqtarǵa «azyq» bere alady», delingen.

Reportajda Qazaqstan tirshiliginiń barlyq salasy qamtylǵan, degenmen syrtqy saıasatyna, EQYU-ǵa tóraǵalyǵyna energetıka men aýyl sharýashylyǵyn qosa otyryp ekonomıkalyq damýyna erekshe kóńil aýdarǵan. Onda táýelsiz Qazaqstannyń damý tarıhyna keńinen taldama jasalǵan. Jýrnalda Elbasy Nursultan Nazarbaevpen, Premer-Mınıstr Kárim Másimovpen, Memlekettik hatshy - Syrtqy ister mınıstri Qanat Saýdabaevpen, Konstıtýtsııalyq keńestiń tóraǵasy Igor Rogovpen, Ekonomıka jáne bıýdjettik josparlaý mınıstri Baqyt Sultanovpen, Kólik jáne kommýnıkatsııa mınıstri Ábilǵazy Qusaıynovpen, Eńbek jáne halyqty áleýmettik qorǵaý mıınstri Gúlshara Ábdihalyqovamen jáne basqa da elimizdiń saıası qaıratkerlerimen aradaǵy suhbattar jarııalanǵan.

Elbasy Nursultan Nazarbaevtyń pravoslavıelik hrıstıandardy jáne barsha qazaqstandyqtardy jarqyn meıram - Rojdestvo merekesimen quttyqtaýy «Kazahstanskaıa pravda» gazetiniń búgingi sanynda jaryq kórdi. Memleket basshysynyń quttyqtaýynda «Qazaqstanda pravoslavıe eń kóp taraǵan konfessııanyń biri bolyp tabylady. Orys pravo­slavıe shir­keýi memleket pen dinı birlestik­ter­diń arasynda oń qarym-qaty­nas­tardyń damýyna, qoǵamymyzda beıbitshilik pen kelisimniń ny­ǵaıýy­na úlken úles qosyp keledi. Bul tereń qurmet­ke jáne qadir­leý­shilikke laıyq. Bizde Rojdestvonyń Qurban aıtpen birge demalys kúni bolyp jarııalanǵany kez­deısoqtyq emes. Pravoslavıe dinbasylary men din ókilderi óz qyzmetteri men senimderi aıasynda ózge de barlyq konfessııa ókilderimen birge elimizdiń damýyna, onyń yrys-baı­lyǵynyń artýyna rýhanı úles qo­syp, tózimdilik pen túsinistik ta­ny­týda. Orys pravoslavıe shirkeýi - elimizde ótken Álemdik jáne dástúrli dinder kóshbasshylarynyń sezi­ne belsendi qatysýshy», delingen.