Qazaqstan Eýropanyń JI ınfraqurylymyndaǵy mańyzdy ortalyq bola ala ma — Nvidia basshysy
ASTANA.KAZINFORM — Nvidia bas dırektory Djensen Hýang Qazaqstannyń energetıkalyq áleýeti men derekterdi óńdeý ortalyqtaryn damytý jospary eldi Eýropa naryǵyna qyzmet kórsetetin iri jasandy ıntellekt esepteý habyna aınaldyrýǵa múmkindik beretinin aıtty. Bul týraly CNBC Tech jazdy.
Basylymnyń málimetinshe, Djensen Hýang Astanada mınıstr Jaslan Mádıevpen ótken ashyq áńgime barysynda eldiń jasandy ıntellekt salasyndaǵy áleýetine toqtaldy.
— Bul Eýropa úshin esepteý haby, jasandy ıntellekt «zaýytynyń» haby bolady, — dedi Nvidia basshysy.
Hýang sondaı-aq ár memlekettiń óz jasandy ıntellekt ınfraqurylymyn qalyptastyrýy mańyzdy ekenin atap ótti.
Onyń pikirinshe, elder JI qyzmetterin ishki naryqqa usyna alýy, sonymen birge tehnologııalardy óz tili men mádenı erekshelikterine beıimdeýi qajet.
Sonymen qatar elimizdiń tehnologııalyq ınfraqurylymdy damytý josparlary Nvidia-men ǵana shektelmeıdi. Elge ózge de iri tehnologııalyq kompanııalar qyzyǵýshylyq tanytyp otyr.
Atap aıtqanda, bıyl maýsymda Qazaqstan Úkimeti AQSh-tyń Firebird AI kompanııasymen birlesip, jasandy ıntellekt ınfraqurylymyn damytýǵa 10 mlrd dollar ınvestıtsııa salý josparyn jarııalady. Joba aıasynda Nvidia chıpterin qosa alǵanda, 100 myń ozyq grafıkalyq protsessorǵa (GPU) negizdelgen esepteý klasterin qurý kózdelgen.
Oǵan qosa, Nvidia da Firebird kompanııasyna ınvestıtsııa salýdy josparlap otyr. Kompanııanyń resmı málimetine sáıkes, Firebird Armenııa, Qazaqstan jáne basqa da naryqtarda jalpy qýaty shamamen 2 gıgavatt bolatyn jasandy ıntellekt ınfraqurylymyn damytýdy kózdeıdi.
Bul jobalar Qazaqstanda joǵary ónimdi esepteý júıelerin qalyptastyryp, eldiń óńirlik tehnologııalyq ortalyq retindegi múmkindikterin keńeıtýge baǵyttalǵan.
Qazaqstanǵa qyzyǵýshylyq tanytyp otyrǵan taǵy bir kompanııa — AQSh-ta ornalasqan Higgsfield startapy. Jasandy ıntellekt kómegimen beıne jáne sýret jasaý platformasyn ázirleıtin kompanııanyń Qazaqstanda 300-den astam qyzmetkeri bar ınjenerlik jáne shyǵarmashylyq toby jumys isteıdi.
Bıyl tamyzda San-Frantsıskoda kompanııa 5,4 mlrd dollar baǵalaý kezinde 400 mln dollar kóleminde B serııaly ınvestıtsııa tartqanyn jarııalady.
Qarjylandyrý raýndyn DST Global basqardy. Oǵan Tribe Capital, Goldman Sachs Alternatives quramyndaǵy Growth Equity, Smash Capital, Fifth Wall, Valor Capital, Intel Capital, Liberty Global Tech Ventures, Mirae Asset Capital jáne NTT DOCOMO Ventures qatysty.
Osylaısha, Qazaqstanǵa Nvidia, Firebird jáne Higgsfield sekildi tehnologııalyq kompanııalardyń qyzyǵýshylyq tanytýy eldiń jasandy ıntellekt salasyndaǵy halyqaralyq jobalarǵa qatysý aýqymynyń keńeıip kele jatqanyn kórsetedi. Qazir bul baǵyttaǵy josparlar esepteý ınfraqurylymyn damytýdy, ınvestıtsııa tartýdy jáne tehnologııalyq mamandardyń áleýetin arttyrýdy qamtıdy.
Buǵan deıin, Qazaqstan JI ındýstrııasy NVIDIA-men áriptestikten ne utatynyn jazǵanbyz.
