Qazaqstan Eýropalyq odaqpen yntymaqtastyq pen áriptestikti nyǵaıtý jumystaryn jalǵastyrady - E. Ydyrysov
ASTANA. 19 jeltoqsan. QazAqparat - Qazaqstan Eýropalyq odaqpen yntymaqtastyq pen áriptestikti nyǵaıtý boıynsha jumysty jalǵastyrady. Bul týraly búgin QR Prezıdenti janyndaǵy Ortalyq kommýnıkatsııalar qyzmetinde ótken brıfıng barysynda QR Syrtqy ister mınıstri Erlan Ydyrysov málim etti.
Mınıstrdiń aıtýynsha, búgingi kúni Eýropalyq odaqpen áriptestikti jáne yntymaqtastyqty keńeıtý týraly kelisim jasaý jónindegi jumystar jalǵasýda. «Innovatsııalyq-tehnologııalyq áriptestikten bólek, kelisimshart aıasyndaǵy asa mańyzdy baǵyttardyń bir bóligi bizdiń azamattarymyz úshin vızalyq rejımdi lıberaldandyrý jónindegi satyly jumystarǵa qatysty bolmaq. Jalpy, Azııadaǵy saıası jáne ekonomıkalyq yntymaqtastyqtyń qarqyndy damý barysy shyn máninde Azııa-Tynyq muhıty óńiri elderimen ekijaqty jáne kópjaqty baılanystardyń keńeıýin talap etedi. Sondyqtan da, syrtqy saıasat vedomstvosy Azııa-Tynyq muhıt óńiriniń elderimen saýda-ekonomıkalyq, ınvestıtsııalyq-tehnologııalyq yntymaqtastyqty eń joǵary deńgeıde paıdalanýǵa múddeli», - dedi E. Ydyrysov.
