Qazaqstan Eýropalyq odaqqa Ortalyq Azııadaǵy rólin kúsheıtýdi usyndy
ASTANA. QazAqparat - QR Syrtqy ister mınıstri Qaırat Ábdirahmanov Eýropalyq odaqtyń Ortalyq Azııamen aldaǵy yntymaqtastyǵy boıynsha Qazaqstan usynystaryn jarııalady, dep habarlaıdy QazAqparat tilshisi.
Ol Qazaqstannyń jeke kásipkerlik, shaǵyn jáne orta bıznes boıynsha birlesken jumysynyń qaıta jańarýyn kórgisi keletinin jetkizdi.
«Biz Eýropalyq odaqqa Ortalyq Azııanyń túrli jobalaryna jeke eýropalyq kapıtaldy tartýǵa kómektesetin jańa mehanızmder jasap shyǵarýdy usynamyz. Bul eýropalyq kompanııalardyń óńirlik naryqqa shyǵýyna jańa múmkindikter ashady jáne óńirdegi EO rólin kúsheıtedi», - dedi Syrtqy ister mınıstri EO men Ortalyq Azııa qatynastarynyń 25 jyldyǵyna arnalǵan kezdesýde.
Mınıstr Qazaqstan Ortalyq Azııanyń jaı ǵana tranzıttik óńiri bolyp qalmaýy kerek degen pikirde. Ortalyq Azııa elderiniń ekonomıkasyn tıimdi ártaraptandyrý úshin jáne suranysqa ıe joǵary tehnologııaly óndiristerdi qurý úshin EO tájirıbesin qoldaný qajet.
Sonymen birge, Qazaqstan tsıfrlandyrýda, ekologııa, sý resýrstary, adam quqyqtary jáne zańnyń ústemdik qurýy máselelerinde jańa tájirıbelerdi qoldanýǵa múddeli.
Odan bólek, Qazaqstan Aýǵanstannyń turaqtalýyna qoldaý kórsetýdi jalǵastyrýdy usyndy.
«Jalpy alǵanda biz Eýropalyq odaqty jańa strategııa aıasynda Ortalyq Azııadaǵy rólin kúsheıtýge shaqyramyz», - dep túıindedi sózin Qaırat Ábdirahmanov.
Óz kezeginde Ortalyq Azııa boıynsha EO ókili Peter Býrıan atalǵan usynystardy maquldady.
