Qazaqstan eýropalyq seriktestermen ınvestıtsııalyq jobalardy keńeıtýdi kózdeıdi
ASTANA. KAZINFORM — Oljas Bektenov «Qazaqstan-Eýroodaq» dıalogtik platformasynyń 18-shi otyrysyn ótkizdi, dep habarlaıdy Úkimettiń baspasóz qyzmeti.
Premer-mınıstr Oljas Bektenovtiń tóraǵalyǵymen Qazaqstandaǵy aǵymdaǵy ózara is-qımyl jáne iskerlik ahýaldy odan ári jaqsartý máseleleri jónindegi «Qazaqstan-Eýroodaq» dıalogtik platformasynyń 18-shi otyrysy ótti. Jıynǵa EO elderi bıznes-qoǵamdastyǵynyń ókilderi, dıplomatııalyq mıssııalar jáne saýda-ónerkásip palatalarynyń basshylary qatysty.
Eýropalyq Odaq — Qazaqstannyń iri saýda jáne ınvestıtsııalyq seriktesi. Bıyl 9 aıda Qazaqstan men EO arasyndaǵy taýar aınalymy $33,1 mlrd-ty qurady. Osy jyldyń birinshi jartyjyldyǵynda EO elderinen Qazaqstan ekonomıkasyna tikeleı sheteldik ınvestıtsııanyń jalpy aǵyny $4,2 mlrd-qa jetti. Elimizde mashına jasaý, energetıka, agrohımııa, farmatsevtıka, azyq-túlik ónerkásibi sııaqty basqa da salalarda eýropalyq kapıtaldyń qatysýymen 4 myńnan astam kásiporyn jumys isteıdi. Olardyń arasynda Alstom, Claas, Carlsberg, Polpharma jáne basqa da birqatar kompanııa bar. Premer-mınıstr Oljas Bektenov Qazaqstannyń eýropalyq áriptestermen ózara is-qımyldy tereńdetýge múddeli ekenin atap ótti.
— Memleket basshysy Qasym-Jomart Toqaev óziniń halyqqa Joldaýynda ınvestıtsııalyq saıasatty jetildirýge erekshe kóńil bóldi. Biz ekonomıkaǵa uzaqmerzimdi ınvestıtsııa tartýǵa qolaıly jaǵdaı jasaý úshin jumys istep jatyrmyz. Eýropalyq bıznesti Qazaqstandaǵy qatysýyn keńeıtý úshin jáne óndiristi lokalızatsııalaý maqsatynda jańa birlesken jobalardy júzege asyrýǵa shaqyramyn, — dep atap ótti Oljas Bektenov.
Osy jyldyń 10 aıynda Qazaqstannyń negizgi kapıtalyna salynǵan ınvestıtsııa 13,1%-ǵa ósip, 16 trln teńgege jetti. Qazaqstan Úkimeti ınvestorlardyń múddelerin qorǵaýǵa, bızneske qoldaý kórsetýge kepildik beretin quqyqtyq jáne ınstıtýtsıonaldyq negizderdi josparly túrde nyǵaıtyp keledi. Bızneske arnalǵan ákimshilik talaptardy jeńildetý sharalary aıasynda esep berý túrleriniń jartysyna jýyǵy joıyldy.
EgovBusiness veb-portaly jáne mobıldi qosymsha arqyly ınvestorlarǵa barlyq memlekettik qyzmetter men qoldaý sharalary «bir tereze» qaǵıdaty boıynsha usynylyp otyr. Jalpy, memlekettik qyzmetterdiń 90%-dan astamy onlaın-formatqa aýystyrylǵan. Jańa Salyq kodeksinde ınvestorlar úshin salyqtyq jeńildikter, kedendik baj salyqtarynan bosatý, zattaı granttar berý jáne basqa da jeńildikter túrindegi ıkemdi preferentsııalar saqtalǵan. Bızneske ınfraqurylym boıynsha qoldaý arnaıy ekonomıkalyq, ındýstrııalyq, shaǵyn ónerkásiptik aımaqtarda daıyn óndiris alańdaryn usyný túrinde kórsetiledi.
Jıynda EO elshisi Aleshka Sımkıch, Germanııa elshisi Monıka Iversen, Nıderland elshisi Nıko Shermers, Frantsııa elshisi Sılvan Gıoge, Shvetsııa elshisi Stefan Erıksson, Qazaqstannyń Eýropalyq bıznes qaýymdastyǵynyń tóraǵasy Erlan Dosymbekov, Glovo Qazaqstan (Ispanııa) bas menedjeri Laýra Martın Alkaras usynystary men usynymdaryn aıtty. Bıznes júrgizý men damytý sharttary, boljamdy salyq saıasaty men zań ústemdigine qatysty jáne taǵy da basqa máseleler kóterildi. Eýropalyq Odaq elshisi Aleshka Sımkıch Qazaqstan eýropalyq ınvestorlar úshin Ortalyq Azııadaǵy negizgi baǵyt ekenin atap ótti. Yntymaqtastyqtyń keleshegi zor baǵyttary retinde energetıka, tsıfrlyq kommýnıkatsııalar men JI, kólik, densaýlyq saqtaý, aýyl sharýashylyǵy, sý resýrstaryn basqarý sııaqty basqa da salalar ataldy.
— Qazaqstan WEF jahandyq básekege qabilettilik ındeksi sııaqty reıtıngterdegi óz pozıtsııasyn jaqsarta túsýde. Investıtsııaǵa qatysty birqatar negizgi kórsetkish boıynsha Qazaqstan óńirde kósh bastap tur. Investorlar jaǵdaıyn odan ári jaqsarý bolashaqta úlken paıda ákelýi múmkin, — dedi Nıderlandy elshisi Nıko Shermers.
Frantsııa elshisi Sılvan Gıoge ınvestorlar úshin senimdi quqyqtyq baza qalyptastyryp otyrǵan memlekettik deńgeıdegi reformalarǵa baılanysty frantsýz kompanııalary Qazaqstan naryǵyna úlken qyzyǵýshylyq tanytyp otyrǵanyn aıtty. Shvetsııa elshisi Stefan Erıksson Qazaqstandaǵy tsıfrlyq transformatsııanyń mańyzdylyǵyn atap ótip, shved kompanııalarynyń jasandy ıntellekt tehnologııalaryn engizý salasynda tájirıbe almasýǵa múddeli ekenin rastady. Otyrys qorytyndysy boıynsha qatysýshylar Qazaqstan men EO arasyndaǵy saýda-ekonomıkalyq qatynastardy damytýǵa jáne ınvestıtsııalyq baılanystardy jandandyrýǵa jan-jaqty yqpal etýge daıyn ekenderin jetkizdi. Premer-mınıstr memlekettik organdar men uıymdarǵa jıynda aıtylǵan máseleler men usynymdardyń barlyǵyn pysyqtaýdy tapsyrdy.
Budan buryn Premer-mınıstr Oljas Bektenov «Kazakh Invest» ulttyq kompanııasy» AQ dırektorlar keńesiniń otyrysyn ótkizip, onda Memleket basshysynyń el ekonomıkasyna ınvestıtsııa tartý jónindegi tapsyrmalarynyń oryndalý barysy qaraldy.