Qazaqstan Eýropaǵa 2,3 mlrd dollardyń taýaryn eksporttaýǵa daıyn - Álıhan Smaıylov
Álıhan Smaıylovtyń aıtýynsha, Eýroodaq – Qazaqstannyń saýda-sattyq salasyndaǵy eń iri jáne mańyzdy seriktesteriniń biri, elimizdiń syrtqy saýdasynyń shamamen 30% Eýroodaqtyń úlesine tıesili.
Máselen, ótken jyly taýar aınalymynyń ósimi 38%-dan asyp, shamamen 40 mlrd dollar boldy.
Bıyl da bul kórsetkish qarqyndy ósip keledi: 3 aıda saýda kólemi 12,5%-ǵa ulǵaıyp, 10 mlrd dollardan asty.
Osy oraıda Qazaqstan Eýropaǵa jalpy quny shamamen 2,3 mlrd dollar bolatyn 175 taýar pozıtsııasy boıynsha eksportty ulǵaıtýǵa daıyn.
«Biz Eýropalyq Odaqpen yntymaqtastyqtyń sapasyn arttyrýǵa basymdyq beremiz jáne Qazaqstan men Eýropa arasyndaǵy senim men qurmetke negizdelgen ózara is-qımyldy ári qaraı nyǵaıtýǵa nıettimiz», — dedi Premer-Mınıstr.
Sonymen qatar Úkimet basshysy Qazaqstan men EO arasyndaǵy ınvestıtsııalyq yntymaqtastyqtyń jańa deńgeıge kóterilip jatqanyn atap ótti.
Atap aıtqanda, ótken jyly Eýroodaqtan Qazaqstan ekonomıkasyna tartylǵan tikeleı ınvestıtsııa kólemi shamamen 23% ósip 12,5 mlrd dollar boldy, bul – sońǵy 10 jyldaǵy rekordtyq kórsetkish.
«Biz ınvestıtsııalyq yntymaqtastyqty odan ári keńeıtý úshin qolda bar múmkindikterdiń barlyǵyn iske qosýǵa múddelimiz», — dedi Álıhan Smaıylov.
Óz tarapynan Valdıs Dombrovskıs Eýroodaq pen Qazaqstan arasyndaǵy qarym-qatynastar óte serpindi damyp kele jatqanyn atap ótti.
«Biz Ortalyq Azııa men Eýropalyq Odaq elderi arasynda júk tasymaldaýdyń jańa joldary men múmkindikterin damytýǵa múddelimiz. Ol úshin ınvestorlardy óńirdegi jobalarǵa tartý qajet, bul tasymaldaý kezinde kedergilerdi joıýǵa jáne ınfraqurylymdy damytýǵa yqpal etedi», — dedi Valdıs Dombrovskıs.
Buǵan deıin Eýropalyq Odaq pen Qazaqstan 9 mln eýronyń jobalaryn iske asyrýdy kózdeıtin «QR-EO yntymaqtastyq quraly» qarjylyq kelisimine qol qoıǵanyn jazǵan bolatynbyz.