Qazaqstan Eýropa men Kavkazdyń teńiz porttarynan termınaldar satyp almaq
ASTANA. KAZINFORM – Qazaqstan Eýropa men Kavkazdyń teńiz porttarynan termınaldar satyp almaq. Bul týraly Temirjoldar yntymaqtastyǵy uıymy konferentsııasynyń 40-otyrysynda «Qazaqstan temir joly» UK» AQ Basqarma tóraǵasy Talǵat Aldybergenov aıtty.
Onyń aıtýynsha, kólik toraptarynyń toǵysynda ornalasqan Qazaqstan árdaıym Shyǵys pen Batysty baılanystyratyn senimdi býyn bolyp keledi.
– Biz Qytaıdyń shyǵys jaǵalaýynan Eýropaǵa deıingi tıimdi logıstıkalyq tik júıeni qalyptastyryp jatyrmyz. Onyń ishinde Kavkaz elderi arqyly Ońtústik Eýropaǵa ótetin Transkaspıı halyqaralyq kólik baǵyty bar. «Bir beldeý – bir jol» jahandyq bastamasy aıasynda ınfraqurylymdyq josparlarymyzdy kórshilermen úılestirip, qýatty sınergetıkalyq áserge qol jetkizip otyrmyz. Úzdiksiz logıstıkany qamtamasyz etý úshin syrtqy termınaldar jelisin kezeń-kezeńimen keńeıtýdemiz, – dedi Talǵat Aldybergenov.
QTJ basshysynyń dereginshe, 2014 jyldan beri mynadaı Qazaqstan-Qytaı jobalary júzege asyryldy:
• Lıanıýngan porty – onda Ońtústik-Shyǵys Azııadan keletin júkter shoǵyrlandyrylady;
• Qorǵas – Shyǵys qaqpasy qurǵaq porty (Altynkól stantsııasy) – Qytaımen shekaradaǵy eń iri logıstıkalyq hab;
• Sıan qurǵaq porty – Eýropa baǵytyna jóneltiletin konteınerlik poıyzdardyń shamamen 40 paıyzy osy jerde jasaqtalady.
Osy ınfraqurylymdardyń arqasynda Sıan – Potı baǵyty boıynsha jetkizý merzimi rekordtyq 15-18 táýlikke deıin qysqardy. Kelesi maqsat – bul kórsetkishti 10–12 kúnge deıin tómendetý. Sonymen qatar Eýrazııalyq ekonomıkalyq odaq elderimen birlesken jobalar da júzege asyrylyp jatyr.
– Tabysty mysal retinde Birlesken kólik-logıstıkalyq kompanııa – Eýrazııalyq temirjol alıansy jobasyn aıtýǵa bolady. Bul – geografııadan sınergııanyń basym túskeniniń aıqyn dáleli. Sonyń arqasynda Azııa men Eýropa arasyndaǵy eń qysqa baǵyt qalyptasty. Qazir bul tek marshrýt emes, álemdik etalon: jol júrý ýaqyty 12–14 táýlik. 12 jyl ishinde tasymal kólemi alǵashqy jylmen salystyrǵanda 100 eseden astam ósti, – dedi QTJ basshysy.
Sonymen qatar ol Eýropa men Kavkazdaǵy teńiz porttarynda termınaldyq qýattardy satyp alý jumystary júrgizilip jatqanyn aıtty.
– Bizdiń maqsatymyz – tek aktıvterge ıelik etý emes, Shyǵys – Batys jáne Soltústik – Ońtústik baǵyttaryn baılanystyratyn biryńǵaı kólik qańqasyn qalyptastyrý, – dep atap ótti Talǵat Aldybergenov.
Aıta keteıik, elimiz 2023 jylǵa qaraı tranzt kólemin jylyna 100 mln tonna jetkizýdi josparlap otyr.
