Qazaqstan Eýropa men Azııany jalǵaıtyn kólik dálizin damytýǵa nıetti

ASTANA. KAZINFORM — Qazaqstan Ortalyq Azııa men Eýropa arasyndaǵy kólik baılanysyn damytýǵa qoldaý bildiredi, dep habarlaıdy QR SІM baspasóz qyzmeti.

Qazaqstan Eýropa men Azııany jalǵaıtyn kólik dálizin damytýǵa nıetti
Foto: QR SІM

Syrtqy ister mınıstri Muhtar Tileýberdi Eýropalyq Odaq, Qara teńiz óńiri, Ońtústik Kavkaz jáne Ortalyq Azııa arasyndaǵy óńiraralyq ózara baılanysty damytýǵa arnalǵan ekinshi mınıstrlik kezdesýine qatysty. Іs-sharaǵa Eýropalyq Odaqqa múshe memleketter men atalǵan óńirlerdiń Syrtqy ister mınıstrleri, sondaı-aq Eýropalyq komıssııa basshylyǵy qatysty.

Muhtar Tileýberdi óz sózinde tranzıttik-kólik áleýetin damytý jáne ınfraqurylymdy jańǵyrtý Memleket basshysy Qasym-Jomart Toqaevtyń qazan aıynda Qazaqstan halqyna arnaǵan Joldaýynda aıqyndalǵan Qazaqstannyń strategııalyq basymdyqtarynyń biri ekenin atap ótti.

Mınıstr Qazaqstannyń kólik, logıstıka, energetıka jáne tsıfrlandyrý salalarynda eýropalyq jáne óńirlik áriptestermen yntymaqtastyqty odan ári nyǵaıtýǵa múddeli ekenin rastady. Eýropa men Azııa arasyndaǵy kólik baılanysyn nyǵaıtýdyń negizgi baǵyttarynyń biri retinde Transkaspıı halyqaralyq kólik baǵdaryna (Orta dáliz) erekshe nazar aýdaryldy.

Osyǵan baılanysty ınvestıtsııalar tartý, kólik ınfraqurylymyn damytý jáne ózara tıimdi birlesken jobalardy iske asyrý maqsatynda Eýropalyq Odaqpen «Global Gateway» bastamasy aıasyndaǵy yntymaqtastyqty odan ári jalǵastyrýdyń mańyzdylyǵy atap ótildi.

— Mınıstr Qazaqstannyń logıstıkalyq rásimderdi jetildirý jáne Eýropa men Azııany baılanystyratyn tıimdi ári ornyqty kólik jelisin qalyptastyrý maqsatynda seriktester men belsendi ózara is-qımyl jasaýǵa daıyn ekenin rastady. Kezdesý barysynda qatysýshylar jańartylatyn energııa kózderi salasyndaǵy transshekaralyq jobalardy damytý men energetıkalyq qaýipsizdikti nyǵaıtýdy qosa alǵanda, energetıkalyq yntymaqtastyqtyń perspektıvalaryna jeke nazar aýdardy, — delingen habarlamada.

Budan buryn belgııalyq sarapshy Orta dálizdiń damýy Qazaqstan men EO úshin jańa múmkindikter ashatynyn aıtty.