Qazaqstan Eýropa fýtbolynyń ortalyǵyna aınaldy - Á. Jaqsybekov
ASTANA. QazAqparat - 2013 jyly Qazaqstan Eýropa fýtbolynyń ortalyǵyna aınaldy. Bul týraly búgin Astanada ótken Qazaqstan fýtbol federatsııasynyń onynshy esepti konferentsııasynda federatsııa prezıdenti Ádilbek Jaqsybekov aıtty.
«2013 jylǵy fýtbol maýsymy Qazaqstan fýtbolynyń júz jyldyq mereıtoıyna tuspa-tus kelip, sonyń aıasynda kóptegen aýqymdy is-sharalar uıymdastyryldy. Máselen, óz tarıhynda birinshi ret ÝEFA Kongresi Astanada ótip, Qazaqstan Eýropa fýtbolynyń ortalyǵyna aınaldy, álem elderi elordamyzdaǵy is-sharaǵa kýá boldy. Sonymen qatar, Qaraǵandynyń «Shahteri» Qazaqstan fýtbolynyń tarıhynda tuńǵysh ret Eýropa lıgasynyń toptyq kezeńine joldama aldy», - dedi Á. Jaqsybekov.
Onyń aıtýynsha, Qazaqstan ulttyq quramasy on resmı jáne joldastyq kezdesýdi joǵary dárejede ótkizdi. Al áıelder ulttyq quramasy 7 resmı oıyn ótkizip, óz tobynda 5-oryndy ıemdendi. Qazaqstan jastar quramasy «Eýro-2015» irikteý dodasynda sátti óner kórsetýde. Olar búginge deıin óz tobynda Belorýssııa, Armenııa jáne Islandııa quramalaryn tize búktirdi.
Federatsııa prezıdentiniń málimetteri boıynsha, jastar jáne buqara halyq arasynda fýtboldy keńinen nasıhattaý sharalary da sátti jalǵasýda.
«Búginde elimizde 13 fýtbol ortalyǵy jumystaryn júrgizýde. Onyń ekeýi bıyl ashyldy (Qyzylorda jáne Semeı). Bolashaqta elimizdiń barlyq aımaǵyn fýtbol ortalyqtarymen qamtý isi josparlanǵan. 2013 jylǵy fýtbol maýsymynda áýesqoı komandalar arasynda el kýbogy jáne Qazaqstan birinshiligi uıymdastyryldy», - dedi Á. Jaqsybekov.
Onyń aıtýynsha, sondaı-aq, ardagerler arasyndaǵy chempıonat jáne shaǵyn fýtbol men stýdentter fýtboly birinshilikteri ótti. QR Bilim jáne ǵylym mınıstrligimen birlese Qazaqstan fýtbol federatsııasy 2014 jyldyń mamyrynan bastap Stýdentter Ulttyq Lıgasyn qolǵa aldy. Bul lıga elimizdiń barlyq aımaqtaryn qamtýdy maqsatqa alǵan. Bulardan bólek, 2013/2014 jylǵy fýtbol maýsymynda 21 jasqa deıingi daıyndyq toptary arasynda Qazaqstan chempıonaty ótkizildi.
Aıta keteıik, atalmysh sharaǵa aımaqtyq fýtbol federatsııalarynyń ókilderi, QFF Atqarý komıtetiniń músheleri, sondaı-aq Premer-lıga jáne Birinshi lıga fýtbol klýbtarynyń ókilderi qatysty.
