Qazaqstan Eýropa boıynsha kodeks alımentarıýstyń úılestirýshisi bolyp taǵaıyndaldy

ASTANA. QazAqparat - 2017 jylǵy 17-22 shilde aralyǵynda Jenevada Kodeks alımentarıýs komıssııasynyń 40-shy sessııasy ótti. Atalǵan sessıǵa QR Densaýlyq saqtaý mınıstrliginiń Qoǵamdyq densaýlyqty saqtaý komıtetiniń tóraǵasy - Bas memlekettik sanıtarııalyq dárigeri Jandarbek Bekshın bastaǵan Qazaqstan delegatsııasy qatysty.

Atalǵan sessııada Qazaqstan Respýblıkasy 2018-2019 jyldarǵa Kodeks Alımentarıýs Komıssııasynyń Eýropa boıynsha FAO/DDU Úılestirýshi komıtetiniń tóraǵasy retinde biraýyzdan taǵaıyndaldy.

Qazaqstan quramyna Eýropa óńiri men Ortalyq Azııanyń 52 eli kiretin FAO/DDU-nyń Úılestirýshi komıtetine 2003 jyldan bastap múshe bolyp tabylady.

Kodekstiń mıssııasy tamaq ónimderiniń qaýipsizdigin jáne ǵalamdyq deńgeıde adal saýdany qamtamasyz etý, tamaq ónimderine arnalǵan halyqaralyq standarttardy jáne taǵam qaýipsizdigin qamtamasyz etýdiń basshylyqqa alynatyn qaǵıdattaryn ázirleýden turady. Qabyldanatyn standarttar taǵamdyq qospalar úshin ruqsat etilgen shekti kórsetkishter nemese pestıtsıdterdiń qaldyq mólsherleri týraly  erejelerdi ázirleýden tańbalaýda taǵamdyq qundylyǵy týraly málimetterdi kórsetý boıynsha basshylyq, taǵam ónimderi gıgıenasynyń jáne mıkrobqa qarsy preparattarǵa qatysty ornyqtylyqtyń jalpy prıntsıpterin qoldaný boıynsha ádistemelik nusqaýlarǵa deıin ázirleýdi qamtıdy.

Eýropa boıynsha FAO/DDU Úılestirýshi komıtetine tóraǵalyq etý Qazaqstanǵa Ekonomıkalyq yntymaqtastyq jáne damý uıymy elderiniń tájirıbesi boıynsha taǵam qaýipsizdigin qamtamasyz etý úshin ulttyq strategııany tıimdi iske asyrýǵa biregeı múmkindik alýǵa, bıznesti qolaıly júrgizý úshin taǵam standarttaryn úılestirýge jáne qoldanýǵa, eldiń eksporttyq áleýetin arttyrýǵa, otandyq ónimderdi álemdik naryqqa jyljytýǵa jáne halyqaralyq ǵalamdyq ekonomıkaǵa ıntegratsııalanýǵa múmkindik beredi.

Aıta ketý kerek, 50 jyldan asa ýaqyt ishinde Kodekstiń múshe elderi halyqaralyq naryqtarda iske asyrylatyn tamaq ónimderiniń standarttaryn kelisý boıynsha jumystar júrgizýde. Bul standarttar tutynýshylardyń qaýipsizdigin, qoǵamdyq densaýlyq saqtaýdy jaqsartýǵa jáne elder arasyndaǵy artyq saýda kedergilerin qysqartýǵa múmkindik berdi. Osyndaı birlesken jumys elderge Kodeks standarttarymen kepildik berilgen sapaly jáne qaýipsiz taǵam ónimin satyp alýǵa múmkindik beredi.

Eske sala ketsek, Alımentarıýs kodeksiniń komıssııasy Azyq-túlik jáne aýyl sharýashylyǵy uıymynyń (FAO (Food and Agriculture Organization, FAO) jáne Dúnıejúzilik densaýlyq saqtaý (DDU) uıymynyń birlesken úkimetaralyq organy bolyp tabylady jáne álemniń 7 geografııalyq óńirinen 188 múshe eldi qamtıdy.

Alty óńirlik Úılestirýshi komıtetten (Afrıka, Azııa, Eýropa, Taıaý Shyǵys, Latyn Amerıkasy elderi jáne Karıb óńiri, Soltústik Amerıka elderi) jáne jalpy máseleler men taýarlar boıynsha 18 Komıtetten turady.