Qazaqstan Eýroodaqpen dári-dármek salasyndaǵy yntymaqtastyqty keńeıtpek
ASTANA. QazAqparat - QR Premer-Mınıstri Álıhan Smaıylovtyń tóraǵalyǵymen ótken «Qazaqstan-Eýroodaq» dıalog platformasynyń 11-otyrysyna qatysýshylar densaýlyq saqtaý jáne farmatsevtıka salasyndaǵy yntymaqtastyqty nyǵaıtý máselelerin talqylady. Bul týraly QazAqparat Úkimettiń saıtyna silteme jasap habarlaıdy.
«Qazaqstan men Eýroodaq aldynda medıtsına jáne farmatsevtıka salalaryndaǵy áriptestikti nyǵaıtý úshin keń múmkindikter ashyldy. Biz ózara yntymaqtastyqqa jáne aldymyzda turǵan mindetterdi birlesip sheshýge daıynbyz», — dedi Álıhan Smaıylov.
Otyrysqa qatysýshylar sala qyzmetkerleriniń biliktiligin arttyrý, medıtsınalyq mekemelerdi basqarý, dári-dármekterge baǵa belgileýdi retteý, zııatkerlik menshik quqyqtaryn qorǵaý, sondaı-aq jalpy densaýlyq saqtaý júıesin damytý máselelerin talqylady. Shara aıasynda «suraq-jaýap» sessııasy ótti, onyń barysynda ortalyq memlekettik organdardyń ókilderi sheteldik áriptesterdiń qyzyqtyrǵan taqyryptary boıynsha saýaldaryna jaýap berdi.
Otyrysty qorytyndylaı kele, Premer-Mınıstr Úkimet aldaǵy ýaqytta ózara tıimdi yntymaqtastyqty nyǵaıtý jónindegi qadamdardy ázirleý jáne iske asyrý úshin kelip túsken usynystardy jedel qaraıtynyn atap ótti.
Foto: primeminister.kz
