Qazaqstan Eýroodaqpen birlesken ınfraqurylymdyq jáne ınvestıtsııalyq jobalardy damytýǵa daıyn
ASTANA. KAZINFORM — Qazaqstan EO-nyń óńiraralyq ózara baılanystylyqty nyǵaıtý platformasynyń iske qosylýyna qatysty.
Qazaqstan Respýblıkasy Syrtqy ister mınıstriniń orynbasary Arman Isetov Ortalyq Azııa, Ońtústik Kavkaz, Qara teńiz óńiri elderi men Eýropalyq odaq arasyndaǵy yntymaqtastyqty damytýǵa baǵyttalǵan Ózara baılanystylyq kún tártibi platformasynyń (Connectivity Agenda Platform) iske qosylýyna arnalǵan joǵary deńgeıdegi otyrysqa qatysty.
Arman Isetov Ortalyq Azııa men Eýropalyq odaq arasyndaǵy ózara baılanystylyqty odan ári nyǵaıtýdyń, sondaı-aq kólik, energetıka jáne tsıfrlandyrý salalaryndaǵy praktıkalyq yntymaqtastyqty damytýdyń mańyzdylyǵyn atap ótti.
Qazaqstannyń Ortalyq Azııadaǵy eń iri ekonomıka jáne Eýropa men Azııany baılanystyratyn mańyzdy býyn retindegi róline erekshe nazar aýdaryldy. Osy turǵyda Qazaqstannyń kólik, energetıka jáne tsıfrlyq ınfraqurylymdy damytýǵa baǵyttalǵan jobalardy dáıekti túrde iske asyryp, óńiraralyq yntymaqtastyqty nyǵaıtýǵa úles qosyp otyrǵany atap ótildi.
A. Isetov Platformanyń iske qosylýyn 2025 jylǵy qazanda Lıýksembýrgte ótken Ortalyq Azııa, Ońtústik Kavkaz, Qara teńiz óńiri jáne Eýropalyq odaq arasyndaǵy ózara baılanystylyqty nyǵaıtý máseleleri jónindegi mınıstrlik kezdesýde qol jetkizilgen ýaǵdalastyqtardyń naqty nátıjesi retinde quptady. Ol jańa Platforma qoldanystaǵy yntymaqtastyq tetikterin tolyqtyryp, Ortalyq Azııa men Eýropalyq odaq arasyndaǵy Transkaspıı halyqaralyq kólik baǵytyn damytý jónindegi úılestirý platformasymen ózara is-qımyl negizinde jumys isteıtini atap ótildi.
Qazaqstan Platformanyń qyzmetine belsendi qatysýǵa jáne birlesken ınfraqurylymdyq ári ınvestıtsııalyq jobalardy ilgeriletýge járdemdesýge daıyn ekenin rastady.
Qatysýshylar kólik, energetıka jáne tsıfrlandyrý salalaryndaǵy múmkindikter men syn-qaterlerdi, óńiraralyq ózara baılanystylyqty odan ári damytý perspektıvalaryn, ınfraqurylymdy jańǵyrtý jáne birlesken jobalarǵa ınvestıtsııalar tartý máselelerin talqylady.
Іs-sharaǵa Eýropalyq komıssııanyń ókilderi, Ortalyq Azııa, Ońtústik Kavkaz jáne Qara teńiz óńiri elderiniń mınıstrleri, halyqaralyq qarjy ınstıtýttarynyń basshylary, sonyń ishinde Eýropalyq ınvestıtsııalyq bank, Eýropalyq qaıta qurý jáne damý banki, Dúnıejúzilik bank ókilderi, sondaı-aq bıznes qaýymdastyq músheleri qatysty.
