Qazaqstan Eýrazııanyń jetekshi logıstıkalyq ortalyǵyna aınalýy tıis
ASTANA. KAZINFORM – Elimiz halyqaralyq júk aǵyndaryn tolyqqandy uıymdastyrýshy róline kóshýi qajet. Bul týraly Quryltaı otyrysynda "Jańa tarıhı kezeńdegi Qazaqstannyń ózekti mindetteri» atty Qazaqstan halqyna Joldaýyn jarııalap jatqan Prezıdent Qasym-Jomart Toqaev aıtty.
- Álemdik logıstıka aýqymdy transformatsııa men jedel damý kezeńine qadam basty. Teńiz joldarynyń osal tustary qurlyqtaǵy kólik dálizderiniń strategııalyq mańyzyn arttyrdy. Qazaqstan osy tarıhı múmkindikti paıdalanyp, Eýrazııanyń jetekshi logıstıkalyq ortalyǵyna aınalýy tıis. Qazirdiń ózinde Qytaıdan Eýropa qurlyǵyna baǵyttalǵan júk tasymalynyń shamamen 85 paıyzy elimizdiń aýmaǵy arqyly ótedi, - dedi Prezıdent.
Alaıda Memleket basshysynyń paıymynsha, qazirgi qolaıly jaǵdaıǵa qanaǵattaný bolashaqta básekelesterden keıin qalýǵa ákelýi múmkin.
- Qazirden bastap halyqaralyq júk aǵyndaryn tolyqqandy uıymdastyrýshy róline kóshý qajet. Otandyq logıstıkalyq operatorlardy damytýǵa, júkterdi shoǵyrlandyrý jáne taratý ortalyqtaryn qurýǵa erekshe basymdyq berilýge tıis. Sondaı-aq kólik toraptarynyń aınalasynda jańa óndiris oryndary men saýda alańdaryn qalyptastyrý mańyzdy, - dedi Qasym-Jomart Toqaev.
Buǵan deıin Memleket basshysy el ómirindegi tarıhı ózgeristerdiń barlyǵy halyqtyń kóz aldynda bolyp jatqanyn aıtqan edi.
