Qazaqstan eýrazııalyq aımaqta bilim berýdiń jáne ǵylymı jańalyqtardyń eksporttyq ortalyǵyna aınalady - E. Orynbaev
ASTANA. 12 maýsym. QazAqparat - Qazaqstan eýrazııalyq aımaqta bilim berýdiń jáne ǵylymı jańalyqtardyń eksporttyq ortalyǵyna aınalady.
Bul týraly búgin Nazarbaev Ýnıversıtetinde ótip jatqan halyqaralyq forýmda QR Premer-Mınıstriniń orynbasary Erbol Orynbaev málim etti.
"Biz álemdik tájirıbelerdi belsendi túrde jınaqtaýdamyz jáne aldymyzǵa Ortalyq Azııada, TMD elderinde jáne eýrazııalyq aımaqta bilim berýdiń jáne ǵylymı jańalyqtardyń eksporttyq ortalyǵyna aınalýdy naqty maqsat etip otyrmyz. Bizdiń talpynysymyzdyń eń jarqyn kórinisi - Nazarbaev Ýnıversıtetiniń qurylýy. Búginde ol óziniń barlyq ǵylymı áleýetin jumyldyra otyryp, Qazaqstanda qazirgi zamanǵy ınnovatsııalyq ortany qalyptastyrýda. Nazarbaev Ýnıversıteti jańa ınnovatsııalyq klasterdiń ıadrosyna aınaldy. Qazirgi ýaqytta klasterdiń birinshi kezeńin iske asyrý baǵytynda kommertsııalandyrý ofısteri, bıznes-ınkýbatorlar, ilki tehnopark qurylyp úlgerdi. Sonymen qatar munda ındýstrıaldy haı-tek alańy iske qosyldy. Ulttyq halyqaralyq kompanııalardyń qoldaýymen atalmysh alańda óndiristik ınfraqurylymdar men ǵylymı bólinister ashylady", - dep atap ótti E.Orynbaev.
Onyń aıtýynsha, bilim berý salasyn damytýdyń 2020 jylǵa arnalǵan memlekettik baǵdarlamasy bolashaqta Qazaqstanda bilikti ári kásibı mamandardy daıarlaýdy qamtamasyz etedi, sonymen qatar eldiń turaqty ekonomıkalyq damýyna kepil bolmaq.
"Qazaqstan úkimetimen eldiń bilim berý salasyn qarjylandyrýy - bul memlekettiń áleýmettik shyǵyndary emes, shyn máninde ekonomıkalyq ınvestıtsııasy bolyp tabylady. Forým barysynda Qazaqstannyń bilim berý salasyn jańǵyrtýdyń zamanaýı tetikteri jasaqtalady dep esepteımin", - dep túıindedi sózin vıtse-premer.
Eske sala keteıik, búgin Astanadaǵy Nazarbaev Ýnıversıtetinde II Eýrazııalyq joǵary bilim kóshbasshylarynyń forýmy óz jumysyn bastady. Bıyl qatysýshylar joǵary bilim berý salasyndaǵy jahandyq ahýal jáne onyń aımaqtaǵy áseri taqyrybynda talqylaýlar júrgizedi.
