Qazaqstan Eýrazııadaǵy jańa ortalyqqa aınalyp, úlken qadam jasady — reseılik sarapshy
ASTANA. KAZINFORM — Prezıdent Qasym-Jomart Toqaevtyń Reseıge jasaǵan memlekettik sapary eki el arasyndaǵy dıalogtyń strategııalyq sıpatyn taǵy da aıqyndady. Reseılik jýrnalıst ári tarıhshy Maksım Shevchenko Silkway telearnasyna bergen suhbatynda atalǵan sapardyń saıası mańyzy týraly aıtyp berdi.
Reseılik tarıhshynyń aıtýynsha, mundaı sán-saltanatty qabyldaý Qazaqstan Prezıdentine kórsetilgen aıryqsha qurmetti jáne Astananyń Máskeýdiń strategııalyq seriktesi retindegi mańyzyn kórsetti. Maksım Shevchenkonyń sózinshe, Toqaevtyń mártebesi onyń biregeı dıplomatııalyq tájirıbesine negizdelgen.
— Toqaev qazirgi álemde eshkim qaıtalaı almaıtyn aıryqsha ról atqaryp otyr. Sebebi Prezıdent Qytaımen — qytaı tilinde, Tramppen — aǵylshyn tilinde dıalog júrgizedi, ári óziniń kásibı jolynda HH ǵasyrdaǵy ujymdyq qaýipsizdik júıesiniń jahandyq qurylymy — Birikken Ulttar Uıymynyń basshylarynyń biri bolǵan. Meniń oıymsha, dál osy faktorlar Qazaqstan basshysyna kórsetilgen joǵary deńgeıdegi qabyldaýdyń sebebi bolyp otyr. Bul onyń sheber kelissóz júrgizýshi ári bitimger retindegi asa joǵary mártebesin aıqyndaıdy, — deıdi sarapshy.
Sarapshynyń aıtýynsha, bul mártebeni jaqynda ótken Qasym-Jomart Toqaevtyń Vashıngtonǵa sapary da dáleldedi. Qazaqstan Prezıdenti onda «tarıhı aýqymdaǵy mıssııany» oryndaǵan.
Memleket basshysynyń halyqaralyq kezdesýlerin taldaǵan tarıhshy Qazaqstan orta derjava rólin tabysty atqaryp otyrǵanyn jetkizdi.
— Strategııalyq jáne saıası jahandyq ólshemde Qazaqstan orasan zor qadam jasady. Іs júzinde Eýrazııanyń jańa derbes ortalyǵyna aınaldy, men muny quptaımyn, — dedi Maksım Shevchenko.
Onyń aıtýynsha, Qasym-Jomart Toqaevtyń Máskeýge memlekettik saparynda jasalǵan kelisimder oń qabyldanǵan. Qazaqstan men Reseıdiń kez kelgen ıntegratsııalyq jobalary ózara tıimdi jáne bolashaǵy zor bolmaq.
Sonymen birge, Maksım Shevchenko Qazaqstannyń qazirgi syrtqy saıasaty jekelegen kelisimder sheńberinen de asyp túskenin aıtty. Munda keń aýqymdy strategııalyq baǵyt — jahandyq egemendik pen tarıhı sabaqtastyqty aıqyn kórsetý týraly sóz bolyp otyr. Sarapshynyń pikirinshe, munyń bári Qazaqstannyń óńirdegi uzaq merzimdi jáne derbes rólin kórsetedi.
— Qazaqstan ózindik bolmysy bar orta eýrazııalyq derjava retinde strategııalyq baǵytyn qalyptastyryp keledi. Qazaqtar — kóshpendiler mentalıtetin, kókjıekten kókjıekke, teńizden teńizge deıin sozylǵan Uly dalanyń dúnıetanymyn batystyq memlekettik basqarý formalarymen ushtastyra alǵan birden-bir halyq, — deıdi Shevchenko.
Qazaqstan ulttyq biregeıligin saqtap qala aldy — bul kópvektorly syrtqy saıasattyń nátıjesi. Dál osy saıasat eldiń táýelsizdigin qorǵaý quralyna aınalyp, 30 jyldan astam ýaqyt boıy, sonyń ishinde táýelsizdik alǵannan keıingi óńirdegi ekonomıkalyq daǵdarys kezeńinde de mańyzdy ról atqardy.
— Meniń pikirimshe, qazir Qazaqstan jańa deńgeıge kóterilip, naǵyz eýrazııalyq orta memleketke aınalý úshin qadam jasady. Strategııalyq turǵydan alǵanda Qazaqstan úshin ǵana emes, búkil óńir úshin tolyq beıimdelý protsesin Shyńǵyshan murasy — Joshy ulysymen baılanystyramyn, — dep túıindedi spıker.
Eske sala ketsek, 11-12 qarasha kúnderi Qazaqstan Prezıdenti Qasym-Jomart Toqaev Reseı Federatsııasyna memlekettik saparmen bardy. Kelissózder nátıjesinde Qasym-Jomart Toqaev pen Vladımır Pýtın Qazaqstan men Reseı arasyndaǵy ekijaqty qarym-qatynastardy tolyqqandy strategııalyq seriktestik jáne odaqtastyq deńgeıine kóterý týraly Deklaratsııaǵa qol qoıdy.