Qazaqstan Eýrazııadaǵy kólik haby bolýǵa tıis

ASTANA. KAZINFORM - Qazaqstan Eýrazııadaǵy kólik haby bolýǵa tıis. Bul týraly Memleket basshysy Qasym-Jomart Toqaev Qazaqstan halqyna Joldaýynda aıtty.

Memleket basshysy áýemen júk tasymaldaý isine aıryqsha nazar aýdarý qajettigine nazar aýdartty.

- Bul saladaǵy ahýal jaqsaryp kele jatyr. Degenmen, onyń kólemin arttyra túsýge mol múmkindigimiz bar. Men buǵan deıin áýemen tasymaldanatyn júk kólemin eki ese ulǵaıtý jóninde tapsyrma berdim. Buǵan birinshi kezekte, sheteldiń iri ınvestorlaryn tarta otyryp Ulttyq júk tasymaldaýshy kompanııa qurý arqyly qol jetkizýge bolady. Elektrondy saýda-sattyq pen ozyq tehnologııalyq ónimderdiń saýdasy qyzyp turǵan qazirgi kezde áýemen júk jetkizý asa joǵary suranysqa ıe ári tabysy kóp tasymal túri sanalady. Sondyqtan biz áýe habtaryn belsendi túrde damytyp, olardyń jahandyq logıstıka tizbegine kirigýin qamtamasyz etýge tıispiz, - dedi Prezıdent.

Qasym-Jomart Toqaev ekspress-júk tasymaldaý salasyn retke keltirý qajettigin de aıtty.

- Bul qadam tutynýshylardyń múddesin qorǵaý úshin kerek. Qazir búkil álemde pılotsyz júk tasymaldaıtyn arnaıy avtokólikter men drondar sııaqty kólik túrleri damyp jatyr. Úkimet osyndaı tehnologııalardyń tez arada qoldanysqa engizilýine barynsha jaǵdaı jasaýy qajet. Sonyń ishinde, tıisti quqyqtyq aktiler qabyldaýy kerek. Jalpy, men buǵan deıin birneshe ret aıttym: Qazaqstan Eýrazııadaǵy kólik haby bolýǵa tıis. Bul – strategııalyq mańyzy zor mindet. Bul jumysqa osy salada tabysqa jetken úzdik mamandar men kásipkerlerdi tartý kerek. Biraq, negizgi jaýapkershilik – Úkimette. Tapsyrmanyń oryndalý barysyn jyldyń basynda Úkimettiń jyldyq esebinen keıin arnaıy jınalysta qaraımyz, - dedi Prezıdent.

Sondaı-aq Memleket basshysy joǵary tehnologııaǵa 1 mlrd dollar ınvestıtsııa tartý týraly baǵdarlama ázirleý qajettigin aıtty.