Qazaqstan Eýrazııa óńirindegi shıelenisken taraptardy tatýlastyrýǵa bitimshi retinde kúsh salýda - Memhatshy

ASTANA. QazAqparat - QR Prezıdenti N.Nazarbaev jarııa etken «Jańa bolashaq» tujyrymdamasy - bul ıadrolyq, energetıkalyq, aýyz sý men azyq-túlik qaýipsizdigi, senim men ózara túsinistik, jańa reformalar týraly qujat, deıdi búgin Syrtqy ister mınıstrliginde ótip jatqan «Helsınkı qorytyndy aktisiniń (1975) jəne Astanadaǵy Sammıttiń (2010) mereıtoıyna arnalǵan EQYU jetistikteri men qaterleri» atty halyqaralyq konferentsııada QR Memlekettik hatshysy Gúlshara Ábdiqalyqova.

«Qazaqstan Prezıdenti Nursultan Nazarbaev BUU Bas Assambleıasynyń 70-shi sessııasynda atap ótkendeı, aldaǵy otyz jylda jer sharyndaǵy órkenıet soǵys pen shıelenisterdiń torabyn buzatyndaı danalyqqa jetedi. 21-shi ǵasyrda adamzattyń ortaq maqsaty - álemdi soǵys pen shıelenisterden jáne olardyń sebep-saldarlarynan bir jolǵa aryltatyn srategııany júzege asyrý. Sondyqtan da Qazaqstan Prezıdenti «Jahandyq strategııalyq bastamalar-2045» josparyn ázirleýdi usyndy»,-deıdi Memlekettik hatshy. Bul jospardyń maqsaty - adamzat damýyna búkilálemdik jaýapkershilikpen qaraý, jalpy, álemdegi ınfraqurylymǵa, naryqtar men resýrstarǵa barlyq ulttardyń qoly jetetindeı jańa qubylys ákelý. «Qurmetti áriptester, adamzat damýynyń jańa satysyndaǵy mindetterdi naqty anyqtap alatyn ýaqyt jetti. Bul rette, EQYU-ǵa da túsetin salmaq artady. QR Prezıdenti jarııa etken «Jańa bolashaq» tujyrymdamasy - bul ıadrolyq, energetıkalyq, aýyz sý men azyq-túlik qaýipsizdigi, senim men ózara túsinistik, jańa reformalar týraly qujat. Qazaqstan Eýrazııa óńirindegi shıelenisken taraptardy tatýlastyrýǵa deldal retinde kúsh salǵan jáne kúsh sala beredi de»,-dedi sózin túıindegen Memlekettik hatshy.