Qazaqstan Eýrazııa keńistigindegi basty kólik toraptarynyń birine aınalady - Prezıdent
ASTANA. KAZINFORM - Birlesken kúsh-jiger arqyly Qazaqstandy Eýrazııa keńistigindegi basty kólik toraptarynyń birine aınaldyra alamyz. Bul týraly Antonıý Koshtamen jasaǵan birlesken málimdemesinde Qasym-Jomart Toqaev málim etti.
Qazaqstan Prezıdentiniń aıtýynsha, talqylaýǵa arqaý bolǵan negizgi taqyryp – ekonomıkalyq yntymaqtastyq.
– Búgin biz saýda-ınvestıtsııalyq baılanystardy odan ári arttyrýǵa jáne ártaraptandyrýǵa ýaǵdalastyq. Qazaqstan aldaǵy ýaqytta da eýropalyq bıznes ókilderine turaqty ári ashyq ınvestıtsııalyq klımat qalyptastyrýdy jalǵastyra beredi. Energııa tıimdiligi, asa mańyzdy mıneraldar, tsıfrlyq tehnologııa jáne kólik baılanysy sekildi salalarda yntymaqtastyqqa múmkindik mol, – dedi Qasym-Jomart Toqaev.
Memleket basshysy kelissóz barysynda kólik-logıstıka qatynastaryn nyǵaıtý joly, sonyń ishinde Transkaspıı halyqaralyq kólik baǵdaryn damytýǵa birlese kúsh-jiger jumyldyrý máselesi qarastyrylǵanyn atap ótti.
– Bul rette Qazaqstan men Eýropa Odaǵy arasyndaǵy úılestirý platformasynyń jumysyn, sondaı-aq EO-nyń «Global Gateway («Jahandyq qaqpa») bastamasyn quptaımyz. Qazaqstan Eýropa Odaǵynyń Ortalyq Azııa elderine arnalǵan 12 mıllıard eýro kólemindegi ınvestıtsııalyq paketine qoldaý bildiredi. Bul qarjy kólik, shıkizat resýrstary, «jasyl» energetıka jáne tsıfrlyq tehnologııa jobalaryn iske qosýǵa baǵyttalady. Birlesken kúsh-jiger arqyly Qazaqstandy Eýrazııa keńistigindegi basty kólik toraptarynyń birine aınaldyra alatynymyzǵa senimdimiz. Bul barlyq tarapqa da paıdaly. Budan bólek, biz energetıkalyq qaýipsizdik pen energııa resýrstarynyń turaqty jetkizilimin qamtamasyz etý múmkindikterin talqyladyq. Energetıkalyq seriktestiktiń tyń baǵyttarynda, atap aıtqanda, asa mańyzdy mıneraldar, atom energetıkasy, munaı hımııasy, sondaı-aq jańartylatyn qýat kózderi salalaryndaǵy yntymaqtastyqty keńeıtýge ýaǵdalastyq. Maqsatymyz – shıkizat jetkizip qana qoımaı, Eýroodaq standarttaryna saı tabıǵı resýrstardy tereń óńdeıtin jergilikti óndiristerdi damytý, qosylǵan quny joǵary ónim shyǵarý jáne qaldyqtardy óńdeý arqyly Qazaqstannyń eýropalyq jetkizý tizbegimen ıntegratsııasyn kúsheıtý, – dedi Qazaqstan Prezıdenti.
Osyǵan deıin Qasym-Jomart Toqaev pen Antonıý Koshta birlesken málimdeme jasaǵany týraly jazdyq.