Qazaqstan Eýrazııa aımaǵynan ınvestıtsııa tartýda kóshbasshy elderdiń birine aınaldy
ASTANA. KAZINFORM — Qazaqstan Eýrazııalyq óńir elderinen tikeleı sheteldik ınvestıtsııa tartý qarqyny boıynsha kóshbasshy memleketterdiń qataryna endi. Sońǵy eki jylda bul kórsetkish shamamen 1 mlrd AQSh dollaryna artqan. Bul týraly Eýrazııalyq damý bankiniń baıandamasynda aıtylǵan.
2025 jyldyń birinshi jartyjyldyǵynyń qorytyndysy boıynsha, Eýrazııa óńiri elderinen Qazaqstan ekonomıkasyna jınaqtalǵan tikeleı sheteldik ınvestıtsııa kólemi eki jyl ishinde 11,2 paıyzǵa ósken. Al óńirdiń ózge memleketterinde bul ósim orta eseppen 6,4 paıyz shamasynda bolǵan.
Ótken jyldyń ortasyna qaraı Qazaqstanǵa tartylǵan Eýrazııalyq óńir elderiniń ınvestıtsııasy 9,4 mlrd dollardy qurap, barlyq óńirishilik ınvestıtsııalardyń 19,5 paıyzyna teń boldy.
Investıtsııa kóleminiń naqty ósimi shamamen 1 mlrd dollardy qurady. Sarapshylardyń baǵalaýynsha, bul — Eýrazııalyq óńirdegi ózara ınvestıtsııalardyń jalpy ósiminiń úshten birinen astamy.
Investıtsııalyq ósimge eń úlken úlesti Reseı (0,73 mlrd dollar) men Armenııa (0,11 mlrd dollar) salǵan.
Sonymen qatar ınvestıtsııa qurylymynda da eleýli ózgerister baıqalady. Negizgi ósim óńdeý ónerkásibinde tirkelip, bul saladaǵy jınaqtalǵan ınvestıtsııa kólemi 0,84 mlrd dollarǵa artqan.
Aıtarlyqtaı úles qosqan salalardyń biri — agroónerkásip kesheni, munda ınvestıtsııa ósimi 0,34 mlrd dollardy qurady. Al shıkizat sektorynda, kerisinshe, jınaqtalǵan ınvestıtsııa kólemi 0,5 mlrd dollarǵa azaıǵan.
2024 jyly jáne 2025 jyldyń alǵashqy jartysynda iske asqan eń iri úsh ınvestıtsııalyq joba greenfield formatynda júzege asqan. Onyń ekeýi munaı-hımııa salasyna, al bireýi agroónerkásip sektoryna tıesili.
Jalpy alǵanda, Qazaqstan ındýstrııalyq jobalar esebinen ınvestıtsııa tartý qarqynyn kúsheıtip otyr. Sońǵy bir jarym jylda óńdeý sektorynyń jınaqtalǵan ınvestıtsııalar qurylymyndaǵy úlesi 16 paıyzdan 23 paıyzǵa deıin artsa, shıkizat salasynyń úlesi 50 paıyzdan 39 paıyzǵa deıin qysqarǵan.
Aıta keteıik, buǵan deıin elimiz sońǵy 20 jylda 439,7 mlrd AQSh dollary kóleminde tikeleı sheteldik ınvestıtsııa tartqany jaıly jazǵan edik.