Qazaqstan EURAMET-ke seriktes uıym retinde kirdi

NUR-SULTAN. QazAqparat – Qazaqstan EURAMET-ke seriktes uıym retinde kirdi, dep habarlaıdy QazAqparat QR Saýda jáne ıntegratsııa mınıstrliginiń baspasóz qyzmetine silteme jasap.

Baspasóz qyzmetiniń habarlaýynsha, EURAMET ulttyq metrologııalyq ınstıtýttarynyń eýropalyq qaýymdastyǵy – bul Eýropalyq Odaq pen Eýropalyq erkin saýda qaýymdastyǵyna múshe memleketterdiń ulttyq metrologııalyq uıymdarynyń birlesken alıansy.

Osy yntymaqtastyq:

- QR-da metrologııalyq ınfraqurylymdy jáne sapa ınfraqurylymyn jaqsartýǵa;

- zerthanalardyń ózara salystyrýlaryna qatysýǵa;

- birlesken ǵylymı zertteýler júrgizýge múmkindik beredi.

«2022 jyly 30 tamyzda QazStandart pen EURAMET ókilderiniń kezdesýi ótti, osy kezdesýde budan ári yntymaqtastyq jáne Metrologııalyq ınnovatsııalar men zertteýler baǵdarlamasyna (EMPIR) qatysý máseleleri talqylandy»,-delingen habarlamada.