Qazaqstan ettiń ózindik qunyn tómendetý joldaryn qarastyrýda

ASTANA. QazAqparat - Qazaqstan ettiń ózindik qunyn 100-150 teńgege tómendetý joldaryn qarastyrýda. Bul týraly búgin Úkimet otyrysynda «QazAgro» holdınginiń basqarma tóraǵasy Dýlat Aıtjanov málim etti.

Onyń atap ótýinshe, Qazaqstanda 40,5 myń bas asyl tuqymdy iri qara mal jetkizilgen. Bul jospardyń 112 paıyzyn quraıdy. 2011-2013 jyldary aralyǵynda holdıng mal sharýashylyǵy baǵdarlamasy aıasynda shamamen 40 mlrd. teńge qarjy quıǵan. «Bul qarjynyń barlyǵy da respýblıkalyq bıýdjet esebinen berildi», - dedi ol.

Basqarma tóraǵasynyń atap ótýinshe, ettiń ózindik qunynyń joǵary bolýy kúrdeli problemalardyń birine aınalyp otyr. Al onyń basty sebebi - jem baǵasynyń qymbat bolýyna kelip tireledi.

«Qazirgi ýaqytta jumys júrgizýdemiz. Biz jem mólsherin qaıta eseptep, bólý úshin reseılik mamandardy tartýdamyz. Bul et qunyn 100-150 teńgege tómendetip, reseılik naryqta básekege qabiletti bolýyna múmkindik beredi. Biz aýyl sharýashylyǵy mınıstrligine usynys engizdik», - dedi D.Aıtjanov.