Qazaqstan etnosaralyq kelisimniń teńdessiz modelin álemdik qaýymdastyqqa úlgi etip otyr - Almaty ákimi
ALMATY. QazAqparat - Kóp ultty Qazaqstan etnosaralyq kelisimniń teńdessiz modelin álemdik qaýymdastyqqa úlgi etip otyr.
Búgin Almaty qalasynda Qazaqstan halqynyń birligi kúnine arnalǵan merekelik shara barysynda Almaty qalasynyń ákimi Ahmetjan Esimov osylaı dedi.
Qala ákiminiń aıtýynsha, mundaı jetistikke jetýde Memleket basshysy Nursultan Nazarbaevtyń bastamasymen qurylǵan, elimizdegi etnostardyń tól mádenıeti men tilin, salt-dástúrin, ádet ǵurpyn damytýǵa jaǵdaı jasaǵan Qazaqstan halqy Assambleıasynyń úlesi erekshe.
«Búginde elimizdegi 130-dan astam ult pen ulystyń 120-y ásem qalamyz Almatyda tirshilik keshýde. Qalamyzda 34 etnomádenı birlestik belsendi qyzmet etedi. 22 birlestiktiń tóraǵalary Qazaqstan halqy Assambleıasynyń múshesi. Aýdandyq ákimdikterde qoǵamdyq kelisim keńesteri qurylýda. Kóptegen etnomádenı birlestikter janyndaǵy jeksembilik mektepterdiń jumysyna, olardyń óz tilderin damytýǵa qala bıýdjetinen qarjylaı qoldaý qarastyrylǵan. Munyń barlyǵy qalamyzda qolaıly etnosaralyq ahýaldyń ornaǵandyǵyn kórsetedi» - dedi Ahmetjan Esimov
Sonymen qatar, qala ákimi Almatydaǵy Dostyq úıiniń bazasynda Assambleıa qyzmetin jan-jaqty qamtamasyz etý úshin arnaıy memlekettik mekeme qurylatyndyǵyn jetkizdi.
Al Respýblıka alańynda ótip jatqan osynaý merekelik sharaǵa Almaty Qazaqstan halqy Assambleıasy, etnomádenı shyǵarmashylyq ujymdardyń kontsertin uıymdastyrdy. Búkil alań etno-qalashyqqa aınaldyryldy. Árbir etnomádenı birlestikke jeke shatyrlar tigildi. Onda sol birlestikterdiń ókilderi kelýshilerge óz ultynyń tarıhy men mádenıeti, dástúrleri týraly áńgimelep, ulttyq taǵamdarynan dám tatqyzdy.
