Qazaqstan et ónimderin ótkizetin jańa naryqtarǵa shyǵady
ASTANA. KAZINFORM — Qazaqstannan Reseıge jáne Qytaıǵa et eksporttaý kólemi artady.
«Statıstıkaǵa sensek, 2023 jyly et eksporty 24,4 myń tonnany quraǵan, onyń ishinde sıyr eti — 15,8 myń tonna, qoı eti — 7,8 myń tonna. Otandyq et eksportynyń negizgi baǵyttary — Ózbekstan, BAÁ, Qyrǵyzstan, Iran, Kýveıt. 2023 jyly 2022 jylmen salystyrǵanda qus eti eksportynyń 13,7 myń tonnadan 31,5 myń tonnaǵa deıin óskeni baıqaldy. Eksporttyń negizgi baǵyttary — Reseı, Qyrǵyzstan, Ózbekstan, Belarýs, Tájikstan. Qazir qazaqstandyq et jáne et ónimderin óndirýshiler óz ónimderin EAEO, TMD elderiniń aýmaǵyna, sondaı-aq Parsy shyǵanaǵy elderine, Qytaıǵa, Japonııaǵa eksporttaý múmkindigine ıe», — delingen Aýyl sharýashylyǵy mınıstrliginiń Kazinform agenttigine bergen jaýabynda.
Vedomstvo málimetine qaraǵanda, jaqyn arada et ónimderin ótkizetin jańa naryqtar paıda bolady.
«Qazaqstannyń mal sharýashylyǵy ónimderin ótkizýdiń jańa naryqtaryn ashý úshin myna baǵyttarda veterınarlyq talaptardy kelisý boıynsha jumys atqarylyp jatyr: Sıngapýr, Vetnam, Malaızııa, Gonkong. Sondaı-aq, 2024 jylǵy 15 qańtardan bastap Reseıge et eksporty qalpyna keldi, bul eki eldiń Aýyl sharýashylyǵy mınıstrlikteri arasynda qol jetken kelissózdiń nátıjesi boıynsha múmkin boldy», — dep atalyp ótken mınıstrlik aqparatynda.
Atap aıtqanda, Reseıge myna ónimder eksporttalady: sıyr eti, qoı eti, shoshqa eti, sút jáne sút ónimderi, sondaı-aq et ónimderi.
«Budan basqa, 2024 jylǵy 7 aqpannan bastap Qazaqstannan Qytaıǵa qus sharýashylyǵy ónimderin ákelýge shekteýler jáne aýsyl boıynsha buryn qoldanysta bolǵan shekteýler alynyp tastaldy. Qus sharýashylyǵy ónimderin ákelýge tyıym salý 2005 jyldan bastap sozyldy, al aýsyl boıynsha shekteýler 2022 jyly engizildi. Shekteýdi alyp tastaý elimizdiń ońtústik-shyǵys óńirlerinen Qytaıǵa muzdatylǵan sıyr jáne shoshqa etin, sondaı-aq qus sharýashylyǵy ónimderiniń keń aýqymyn eksporttaýdy jańǵyrtýǵa múmkindik beredi. Aıta ketý kerek, endi Qazaqstan eksporttyq taýarlar jelisin keńeıtý boıynsha veterınarlyq talaptardy kelisý rásimin, sondaı-aq Qazaqstannyń barlyq aýmaǵynan kásiporyndarǵa eksporttaýǵa ruqsat berý boıynsha jumysty bastaı alady», — delingen QR AShM málimetinde.
