Qazaqstan et eksporty boıynsha rekord ornatty
«21 jeltoqsandaǵy málimetke súıensek, et eksportynyń kólemi 18,8 myń tonnany qurady. Al josparlanǵan kólem - 15 myń tonna. Syrtqa shyǵarylǵan ettiń teń jartysy Túrkistan oblysyna tıesili. Salystyrmaly túrde aıtatyn bolsaq, 2017 jyly eksportqa shyqqan ettiń kólemi 5,5 myń tonnany quraǵan. Aǵymdaǵy jyldyń ekinshi jartysynan shaǵyn jáne orta sharýashylyqtarǵa negizdelgen «Etti mal sharýashylyǵyn damytý» baǵdarlamasyn iske asyrý bastalyp ketti. Ony júzege asyrý úshin arnaıy jeńil nesıe berýdi qarastyratyn «Sybaǵa» baǵdarlamasy bastaý aldy. Jumys jyldyń ekinshi jartysynda bastalǵanymen, belgilengen mejeden artyq oryndaldy. Búgingi tańda 700 fermer nesıe aldy», - delingen mınıstrliktiń baspasóz habarlamasynda.
Fermerlik sharýashylyqtardyń iri qar mal satyp alý boıynsha jyldyq jospary 50,0 myń basty quraıdy. 11 aıda 67 myń bas maldy satyp alýǵa ótinimder qabyldandy. Sonyń ishinde 55 myń basqa ótinimder maquldanyp, nesıeler berilgen. Sondaı-aq «Altyn asyq» baǵdarlamasy boıynsha 170 myń bas qoı satyp alynǵan.
«Analyq maldy asyldandyrý boıynsha jospar 1,0 mln bas. Búgingi tańda asyldandyrýǵa 977 myń bas mal (98%) qatysyp otyr.
Qazaqstanǵa 14,5 myń bas iri qara ákelingen. Az ýaqyt mal ákelýde kidiris boldy (shilde-jeltoqsan), oǵan sebep ımporttaýshy elderdiń epızootııalyq jaǵdaıy», - dep atap ótti mınıstrlikten.
Sondaı-aq brıfıng barysynda ósimdik sharýashylyǵy salasyndaǵy nátıjeler baıandaldy.
«Oblystyq aýyl sharýashylyǵy basqarmalarynyń málimeti boıynsha, 2018 jyly 15,1ts/ga astyq ónimdiliginen 22,8 mln tonna bıdaı jınaldy. Jalpy astyq kólemi ótken jyldan 760 myń tonnaǵa nemese 3% artyq, astyq ónimdiligi 0,6 ts/ga nemese 4%», - dedi AShM-nan.
Bıylǵy jyly qııar egý kólemi 2,5 myń gektarǵa artqan, jalpy ónim kólemi 460 myń tonnany qurady. Bul ótken jyldan 50 myń tonnaǵa artyq. Іshki naryqtaǵy suranys 480 myń tonnany qurap otyr.
Spıkerler kókónis baǵasynyń kúrt ósýin óndiris maýsymdylyǵymen baılanystyryp otyr. Budan bólek, azyq-túlik taýarlarynyń qymbattaýyna ónimniń ózindik qunyna tikeleı áser etetin faktorlar - janar-jaǵarmaı, elektrqýaty, kommýnaldyq qyzmetter baǵasynyń artýy áser etip otyr.
Áleýmettik mańyzy bar azyq-túlik taýarlarynyń baǵasyn turaqtandyrý maqsatynda óńirler azyq-túlik ónimderine turaqtandyrý qorlaryn quryp jatyr. Qazaqstannyń 5 iri qalasynda kóterme jáne bólshek saýda ortalyqtary qurylysy júrgizilýde.