Qazaqstan estradasynyń juldyzdary K.Dúısekeevtiń shyǵarmashylyq keshinde óner kórsetedi
ASTANA. 25 maýsym. QazAqparat - 2 shildede Astanada Kongress-holl saraıynda kompozıtor, Qazaqstannyń Eńbek sińirgen óner qaıratkeri Keńes Dúısekeevtiń «Altyn besik - Astana» atty avtorlyq keshi ótedi,
dep habarlaıdy astana.kz saıty Astananyń 15 jyldyq merekesin ázirleý jáne ótkizý jónindegi uıymdastkomıteti shtabynyń medıatobyna silteme jasap.
Keshke qonaq retinde Erik Joljaqsynov, Naǵıma Esqalıeva, Marjan Arapbaeva, Maıra Dáýletbaqova, Jubanysh Jeksenuly, Qadyráli Bolmanov, Alısher Karımov, Madına Sádýaqasova, Jeńis Ysqaqova, Aqjol Meıirbekov, Aıjan Nurmaǵambetova, «Dabyl» toby, Nurlan Ónerbaev, Roza Rymbaeva shaqyrylyp otyr.
Erbolat Ahmedıarov jetekshilik etetin sımfonııalyq orkestrdiń súımeldeýimen ánshiler «Qaıda júrdiń», «Erkelediń sen», «Almatym», «Ókinbe sen», «Asyl ana», «Ǵashyqtar jyry», «Týǵan jer», «Alǵashqy mahabbat», «Qaraǵym-aı», «Mahabbat syry», «Altyn besik Astana» jáne taǵy da basqa ánderdi shyrqaıdy.
Keńes Dúısekeev qazirgi zamanǵy keńinen tanylǵan kóptegen mýzykalyq shyǵarmalardyń avtory. Ol birneshe fılmder men teatr qoıylymdaryna da mýzyka jazǵan. Qazirgi ýaqytta ol Qazaq ulttyq óner ýnıversıtetiniń «Kompozıtsııa jáne operalyq-sımfonııalyq dırıjırlik» kafedrasynda dáris oqıdy.
