Qazaqstan Estonııany Baltyq óńirindegi mańyzdy áriptes retinde qarastyrady - Toqaev
ASTANA. KAZINFORM – Qazaqstan Estonııany Baltyq óńirindegi, sondaı-aq jalpy Eýropalyq odaqtaǵy óte mańyzdy áriptes retinde qarastyrady. Bul týraly Aqordada elimizge memlekettik saparmen kelgen Estonııa Prezıdenti Alar Karıspen keńeıtilgen quramdaǵy kelissóz barysynda Memleket basshysy Qasym-Jomart Toqaev aıtty.
- Qazaqstan Estonııany Baltyq óńirindegi, sondaı-aq jalpy Eýropalyq odaqtaǵy óte mańyzdy áriptes retinde qarastyrady. Shynymen de ınnovatsııalyq jáne órkendegen memleket qurý jolyndaǵy Estonııanyń zamanaýı jetistikteri aıtarlyqtaı áserli jáne asa mańyzdy. Estonııa tsıfrlyq basqarýda kóshbasshy ári tsıfrlyq memleket, tsıfrlyq úkimet, tsıfrlyq qoǵam, ashyqtyq, transparenttik, tıimdilik pen azamattardyń jalpy qatysýyn qalyptastyrýdyń jarqyn ári tabysty úlgisi sanalady. Biz Estonııanyń zań ústemdigine, bilim berýdi damytýǵa jáne turaqty damýǵa degen turaqty beıildiligin de joǵary baǵalaımyz. Qarqyndy damyp kele jatqan halyqtarymyz eýropalyq arenada eleýli daýysqa ıe jáne beıbitshilikti, ınnovatsııalardy ári jalpy adamzattyń ujymdyq ilgerileýin damytýǵa adal, - dedi Qazaqstan Prezıdenti.
Memleket basshysy Qazaqstan men Estonııa barlyq qyzmet salasynda berik áriptestik ornatqanyn, damýy da óte jaqsy ekenin aıtty.
- Biz ashyq ári nátıjeli saıası dıalogty, sondaı-aq ózara túsinisti nyǵaıtýda mańyzdy ról atqaratyn parlamenttik toptarymyz arasyndaǵy tyǵyz baılanystardy kútemiz. Sondaı-aq Estonııa tarapynyń Qazaqstannyń reformalar kún tártibine turaqty qoldaý kórsetýin baǵalaımyz ári halyqaralyq uıymdarda syndarly yntymaqtastyqty jalǵastyra beremiz, - dedi Qasym-Jomart Toqaev.
Buǵan deıin Aqordada Memleket basshysy Qasym-Jomart Toqaev elimizge memlekettik saparmen kelgen Estonııa Prezıdenti Alar Karısty qarsy alǵan edi.