Qazaqstan eston kompanııalaryna qoldaý kórsetýge daıyn

ASTANA. KAZINFORM – Elorda Qazaqstan-Estonııa bıznes forýmy ótedi. Bul týraly Aqordada elimizge memlekettik saparmen kelgen Estonııa Prezıdenti Alar Karıspen keńeıtilgen quramdaǵy kelissóz barysynda Memleket basshysy Qasym-Jomart Toqaev aıtty.

- Ekonomıkalyq yntymaqtastyq – seriktestigimizdiń negizgi baǵyttarynyń biri. Saýda aınalymymyzdyń azdaǵan tómendeýine qaramastan biz úmitpen qarap, saýda-ekonomıkalyq kórsetkishterimizdi eki esege arttyrýdy jáne ekonomıkalyq qatynasymyzdy nyǵaıtýdy kútemiz. Búginde 80-nen astam eston kompanııasy Qazaqstanda, ásirese, logıstıka, poshta qyzmetteri jáne samokat kóligin jalǵa berý salalarynda tabysty jumys istep jatyr. Sizdiń delegatsııańyzda bıznes ókildikteriniń bolýy elimizben áriptestikke degen tereń qyzyǵýshylyqty kórsetedi. Al biz óz tarapymyzdan kompanııalaryńyzǵa qoldaý kórsetýge daıynbyz, - dedi Qasym-Jomart Toqaev.

Memleket basshysy Qazaqstan-Estonııa bıznes-forýmy yntymaqtastyq múmkindikterin keńeıtip, jańa seriktestikke jol ashady dep úmittenetinin aıtty.

- Erteń jáne arǵy kúni bıznes-forým aıasynda kúni yntymaqtastyq múmkindikterin talqylaýdy josparlap otyrmyz. Qazaqstan eston ınvestorlaryna tsıfrlyq ınnovatsııalar, kólik, logıstıka, energetıka, sırek mıneraldar, ilgeri óndiris, aýyl sharýashylyǵy jáne basqa da salalarǵa ınvestıtsııa salý úshin ashyq, boljamdy jáne qolaıly jaǵdaılar usynýǵa daıyn, - dedi Prezıdent.

Buǵan deıin Aqordada Memleket basshysy Qasym-Jomart Toqaev elimizge memlekettik saparmen kelgen Estonııa Prezıdenti Alar Karısty qarsy alǵan edi.