Elimizdiń týrızmi men sportynda AI tehnologııalaryn qoldanýdyń jańa kezeńi bastaldy
ASTANA. KAZINFORM – QR Týrızm jáne sport mınıstri Erbol Myrzabosynov jasandy ıntellekt salasyndaǵy álemge tanymal sarapshy, 01.AI kompanııasynyń bas dırektory, Sinovation Ventures kompanııasynyń tóraǵasy, professor Lı Kaı-Fýmen kezdesti, dep habarlaıdy mınıstrliktiń baspasóz qyzmeti.
Kezdesý barysynda taraptar sport pen týrızm salalaryna jasandy ıntellekt tehnologııalaryn engizýdiń keleshegin talqylap, tsıfrlyq transformatsııa baǵytynda tájirıbe almasty.
Mınıstrdiń aıtýynsha, jasandy ıntellektini damytý – Qazaqstannyń strategııalyq basymdyqtarynyń biri. Al sport pen týrızmdi tsıfrlandyrý osy salalardyń tıimdiligin arttyrýǵa jáne jańa múmkindikterdi iske asyrýǵa jol ashady.
Kezdesýde sportshylar, jattyqtyrýshylar, tóreshiler, sport uıymdary men jarystar týraly derekterdi biriktiretin e-Sport biryńǵaı tsıfrlyq platformasyn qurý máselesine erekshe nazar aýdaryldy.
Aldaǵy ýaqytta jattyǵý úderisin taldaý, qalpyna kelý, tamaqtaný jáne jaraqattyń aldyn alý boıynsha jeke usynymdar ázirleý, sondaı-aq beınematerıaldardy taldaý negizinde sportshylardyń tehnıkasy men taktıkasyn jetildirýge arnalǵan jasandy ıntellekt sheshimderin engizý josparlanyp otyr.
Taraptar týrızm salasynda jasandy ıntellektini qoldaný máselesin de keńinen talqylady.
Qazirgi tańda mınıstrlik týrıstik nysandar, baǵyttar, qonaqúıler, ulttyq parkter jáne týrıstik aǵyndar týraly málimetterdi toptastyratyn biryńǵaı tsıfrlyq platformany ázirleý ústinde.
Kelesi kezeńde týrısterge jeke saıahat baǵyttaryn usynatyn, birneshe tilde aqparat beretin ári búkil sapar barysynda súıemeldeıtin ıntellektýaldy tsıfrlyq kómekshi engizý kózdelgen.
Professor Lı Kaı-Fý Qazaqstannyń týrızm salasyndaǵy áleýeti joǵary ekenin atap ótip, jasandy ıntellekt týrıstik qyzmetterdiń sapasyn edáýir arttyra alatynyn aıtty.
Onyń pikirinshe, AI tehnologııalary sheteldik qonaqtarǵa aýdarma jasap, sapar barysynda baǵyt-baǵdar beretin ıntellektýaldy tsıfrlyq kómekshilerdi jasaýǵa, sondaı-aq týrıstik aǵyndardy taldaýǵa, suranysty boljaýǵa jáne tıimdi basqarýshylyq sheshimder qabyldaýǵa qajetti taldamalyq derekterdi ázirleýge múmkindik beredi.
-Kezdesý qorytyndysynda taraptar sport pen týrızm salalaryna zamanaýı jasandy ıntellekt tehnologııalaryn engizý baǵytyndaǵy yntymaqtastyqty odan ári damytýǵa jáne ózara tájirıbe almasýǵa nıetti ekendikterin bildirdi,-delingen habarlamada.
Aıta keteıik, búgingi Parlament palatalarynyń birlesken otyrysynda Memleket basshysy Qasym-Jomart Toqaev túpki maqsat — jahandyq tehnologııalyq landshaftta ornyqqan ozyq tsıfrlyq memleket qurý ekenin aıtty.
