Qazaqstan eskekshileri Qytaıda eki medal jeńip aldy
ASTANA. KAZINFORM — Qytaıdyń Shenıan qalasynda ótip jatqan akademııalyq eskek esýden U19 ben U23 Azııa chempıonatynda qazaqstandyq sportshylar el qorjynyna 1 kúmis, 1 qola medal saldy.
23 jasqa deıingi sanattaǵy 2000 metrge tórttikte erler komandasy márege ekinshi jetip, jeńis tuǵyrynyń ekinshi satysynan kórindi.
Kúmis júldeni Dıdar Saǵymbaev, Tımýr Fomıchev, Vladıslav Galkın, Ivan Chernýhın bastaǵan komanda músheleri ıelendi.
Al dál osy sanatta Qazaqstan áıelder quramasy máre syzyǵyna úshinshi bolyp jetip, qola medal enshiledi.
Áıelder komandasynyń sapynda Melanı Jakýpova, Anjela Polıanına, Valentına Volkodavova, Anastasııa Kýlınıch synǵa tústi.
Shenıan qalasyndaǵy chempıonatta 19 elden kelgen 300-den astam sportshy synǵa túsip jatyr.
Jarys áli jalǵasyp jatyr.
