Qazaqstan eshkimniń artqy aýlasy emes – Jumanǵarın Bloomberg maqalasy jóninde
Úkimet basshysynyń orynbasary Serik Jumanǵarın Úkimette Bloomberg agenttiginiń maqalasy týraly pikir bildirdi, dep habarlaıdy Kazinform.
Bloomberg agenttigi Frantsııa Prezıdenti Emmanıýel Makronnyń Qazaqstanǵa sapary jóninde «Makron ýran men jańa dostaryn tabý úshin Pýtınniń artqy aýlasyna keldi» (Macron Lands in Putin’s Backyard Seeking New Friends and Uranium) maqalasyn jarııalaǵan edi.
Qazaqstandyqtar ondaǵy «Backyard» sózin «artqy aýla» nemese «qora» dep aýdaryp, agenttikke shúılikken.
«Qazaqstan eshkimniń artqy aýlasy emes, bul – táýelsiz memleket, kóp jyldyq tarıhy bar Máńgilik el. Jaqynda Túrkistanda úkimetaralyq komıssııa ótkizip, reseılik áriptesterimdi shaqyrǵan edim. Osydan keıin Qoja Ahmet ıAssaýı kesenesine bardyq. Ekskýrsııa jetekshisi Aqsaraıda sol kezdegi hannyń I Petr elshilerin qabyldaǵanyn aıtyp berdi. Sonda reseılik áriptesterim Qazaqstan tarıhy týraly eshteńe bilmeıtinin moıyndady. Biz Túrkistan men Máskeý arasynda tikeleı reıs ashýǵa ýaǵdalastyq. Kerýen saraıdaǵy 8 D formattaǵy ushatyn teatrdy kórsettik. Munda qandaı artqy aýla týraly sóz bolýy múmkin? Kim kimniń aýlasy? Bári bos áńgime», - dep jaýap berdi S.Jumanǵarın tilshi suraǵyna.
Sonymen birge, vıtse-premer Qazaqstannyń EAEO-ǵa músheligi jóninde áńgimeledi. Eýrazııa keńistiginde kóptegen másele sheshilip jatqanyn jetkizdi.
«Qazaq Air áýe jelisi Chelıabi men Novosibirge ashylyp jatyr. Munyń bizge ne jamandyǵy bar? Bizdiń shıkizatymyz batysqa jańa ótkizý pýnktteri arqyly ótedi dep kelistik. Endi Reseı Baltyq porttary arqyly bizdiń kómirge jeńildikterdi qarastyryp jatyr. Qosymsha tórt ótkizý pýnktin ashýǵa jáne bolashaqta barlyq shekteýdi alyp tastaýǵa kelisip otyr. Kórip otyrǵanyńyzdaı, bul bizdiń kúndelikti saýda-ekonomıkalyq qyzmetimizdiń praktıkalyq máseleleri. Bir elden bir nárseni kóbirek satyp alatynymyz bireýdiń «aýlasy» ekendigimizdi bildirmeıdi. Bizge kerek bolǵan soń, satyp alamyz. Bul turǵyda eshkim bir qadam artqa sheginbeıdi. Bizdiń ókilderimizdiń arasynda aýla da, tómen deńgeıli adamdar da joq», - dep túıindedi S.Jumanǵarın.
