Qazaqstan erte eskertý jáne tabıǵı apattarǵa daıyndyq máselesin halyqaralyq forýmda kóterdi
ASTANA. KAZINFORM - Qazaqstan Respýblıkasynyń Tótenshe jaǵdaılar mınıstri general-leıtenant Shyńǵys Árinov Dýshanbede ótip jatqan «Sý jáne klımattyq táýekelder: ǵylym, monıtorıng jáne basqarý» halyqaralyq forýmynda qazaqstandyq delegatsııany basqaryp bardy.
Tótenshe jaǵdaılar vedomstvolarynyń basshylary, halyqaralyq uıymdar ókilderi men ǵylymı qaýymdastyq músheleri osy alańda klımattyq qaýipsizdik pen dúleı zilzalalar qaýip-qaterlerin azaıtý máselelerin talqylaý úshin bas qosty.
Forýmǵa 10 halyqaralyq uıymnyń ókilderi men 7 eldiń delegatsııalary qatysyp jatyr. Olardyń qatarynda Tájikstan, Ózbekstan jáne Qyrǵyzstan tótenshe vedomstvolarynyń basshylary bar.
Qazaqstannyń TJM delegatsııasy erte eskertý júıelerin damytý, tabıǵı qaýip-qaterlerge monıtorıng júrgizý jáne tótenshe jaǵdaılarǵa daıyndyq deńgeıin arttyrý máselelerin talqylaýǵa qatysyp jatyr. Qatysýshylar halyqty qorǵaý, taýly aýmaqtardyń qaýipsizdigi jáne óńirlik yntymaqtastyqty damytý máselelerine erekshe nazar aýdaryp otyr.
Forým «2018–2028 jyldarǵa arnalǵan Sý turaqty damý úshin» is-qımyldaryń halyqaralyq onjyldyǵynyń joǵary deńgeıdegi tórtinshi halyqaralyq konferentsııasy aıasynda ótip, Sarez kóliniń 115 jyldyǵyna arnaldy. Qatysýshylar klımattyq syn-qaterlerge den qoıýdyń zamanaýı tásilderin, monıtorıngtiń jańa tehnologııalaryn engizý jáne tótenshe jaǵdaılardyń aldyn alý salasyndaǵy halyqaralyq tájirıbe almasý máselelerin qarastyryp jatyr.
Forým qorytyndysy tabıǵı qaýip-qaterlerdiń aldyn alý jáne klımattyq qaýipsizdik salasyndaǵy halyqaralyq yntymaqtastyqty odan ári nyǵaıtýǵa negiz bolady.
Osyǵan deıin Vahsh GES-indegi yqtımal apat birneshe elge qaýip tóndirý múmkindigine baılanysty Ortalyq Azııa elderi kelissóz júrgizgeni týraly jazdyq.
