Qazaqstan erler quramasy Ispanııada grek-rım kúresinen top jardy

ASTANA. QazAqparat – Qazaqstan erler quramasy Ispanııanyń La-Nýsııa qalasynda «Jovenes Promesas» halyqaralyq týrnırinde grek-rım kúresinen top jardy, dep habarlaıdy QazAqparat tilshisi.

«Sportty damytý dırektsııasy» RMQK-nyń baspasóz qyzmetinen málim etkenindeı, grek-rım kúresiniń sheberleri 12 medalmen marapattalyp, jalpykomandalyq esepte 1-orynǵa ıe boldy.

Júldeniń jeteýi – altyn, tórteýi – kúmis, bireýi – qola.

Atap aıtqanda, Erbol Kamalıev (55 kg), Azamat Qurman (60 kg), Erjet Jarylqasyn (63 kg), Sultan Ásetuly (67 kg), Omar Sataev (77 kg), Maqsat Saılaý (87 kg) jáne Asylbek Ábdiqalyq (130 kg) altynnan alqa taqty. Sondaı-aq Asaýhat Muhamadıev (63 kg), Ersin Abyır (55 kg), Dáýlet Jalǵasov (77 kg), Erzat Erlanov (97 kg) ekinshi, Erasyl Mamyrbekov (55 kg) úshinshi orynǵa kóterildi.

Eske sala keteıik, budan buryn qazaqstandyq balýan qyzdardyń Ispanııadaǵy týrnırde 10 medal jeńip alǵanyn jazǵan edik.