Qazaqstan erler quramasy órt sóndirý-qutqarý sportynan álemdik rekord ornatty

ASTANA.KAZINFORM — Ázerbaıjan Respýblıkasynyń Baký qalasynda órt sóndirý-qutqarý sportynan erler arasyndaǵy XXI jáne áıelder arasyndaǵy XII álem chempıonattarynyń qorytyndy jarys kúni ótti.

Qazaqstan erler quramasy órt sóndirý-qutqarý sportynan álemdik rekord ornatty
Foto: TJM

Chempıonattardyń qorytyndy kezeńi ulttyq quramalar úshin sońǵy synaq bolǵan «Jaýyngerlik qanat jaıý» dıstsıplınasy boıynsha ótkizildi. Jarystyń barlyq kúnderinde sportshylar joǵary kásibı jáne fızıkalyq daıyndyqtaryn, komandalyq úılesimdiligin jáne úzdik nátıjege qol jetkizýge degen umtylysyn kórsetti.

Qazaqstan erler quramasy órt sóndirý-qutqarý sportynan álemdik rekord ornatty
Foto: TJM

Jarystyń sońǵy kúni álemniń eń myqty quramalary arasynda tartysty báseke órbidi. Ár komanda joǵary daıyndyq deńgeıin, sheberligi men jeńiske degen jigerin tanytty.

Jarys qorytyndysy boıynsha Qazaqstan Respýblıkasynyń erler quramasy 24,52 sekýnd nátıjesin kórsetip, chempıonattyń altyn medaldaryn jeńip aldy jáne jańa álemdik rekord ornatty.

Ekinshi oryndy 25,08 sekýnd nátıjesimen Mońǵolııa quramasy, úshinshi oryndy 25,45 sekýnd nátıjesimen Ózbekstan quramasy ıelendi.

Qazaqstan erler quramasynyń quramy:

1. Shamshollaev Ansar
2. Anýarbekov Nazarbek
3. Qonysbaev Abaı
4. Abılbaev Dinmuhamed
5. Podgorodetskıı Petr
6. Savon Dmıtrıı
7. Izbasarov Ildar

Áıelder komandalary arasyndaǵy júldeli oryndar tómendegideı bólindi:

1-oryn — Reseı (23,79 sekýnd, álemdik rekord);
2-oryn — Belarýs (23,92 sekýnd);
3-oryn — Qazaqstan (25,41 sekýnd).

Qazaqstan áıelder quramasynyń quramy:

1. Serıkhanova Alla
2. Baıtıkova Aıdana
3. Redjemetova Sıtora
4. Dzolba Oksana
5. Alenına Regına
6. Podgorodetskaıa Krıstına
7. Salmına Valentına

Álem chempıonattarynyń jalpykomandalyq esebi

Tórt kúnge sozylǵan tartysty básekeniń qorytyndysy boıynsha tórt sporttyq dıstsıplınada óner kórsetken ulttyq quramalardyń jalpykomandalyq nátıjeleri anyqtaldy.

Chempıonat barysynda sportshylar ár sekýnd úshin kúresip, joǵary sheberlikterin, tózimdilikteri men komandalyq rýhtaryn kórsetti.

Erler arasyndaǵy jalpykomandalyq esep:

1-oryn — Reseı Federatsııasy;
2-oryn — Belarýs Respýblıkasy;
3-oryn — Qazaqstan Respýblıkasy.

Áıelder arasyndaǵy jalpykomandalyq esep:

1-oryn — Reseı Federatsııasy;
2-oryn — Belarýs Respýblıkasy;
3-oryn — Qazaqstan Respýblıkasy.

Osylaısha, Qazaqstannyń erler jáne áıelder ulttyq quramalary álemniń úzdik úsh komandasynyń qataryna enip, órt sóndirý-qutqarý sportynan erler arasyndaǵy XXI jáne áıelder arasyndaǵy XII álem chempıonattarynyń jalpykomandalyq esebinde qola júldege ıe boldy.

Álem chempıonattarynyń aıaqtalýy ártúrli elderdiń órt sóndirý-qutqarý sportyndaǵy úzdik ókilderin biriktirgen tórt kúndik tartysty sporttyq básekeniń jarqyn qorytyndysy boldy.

Qazaqstan úshin erekshe jetistik – erler quramasynyń «Jaýyngerlik qanat jaıý» dıstsıplınasy boıynsha tarıhı jeńiske jetip, jańa álemdik rekord ornatýy.

Qazaqstandyq sportshylar otandyq órt sóndirý-qutqarý sportynyń joǵary deńgeıin jáne álemniń eń myqty quramalarymen básekege túse alatyn áleýetin taǵy bir márte dáleldedi.

Altyn medaldar, jańa álemdik rekord jáne jalpykomandalyq eseptegi eki qola júlde – Qazaqstan ulttyq quramalarynyń álemdik arenadaǵy laıyqty jetistiginiń aıqyn kórinisi.