«Qazaqstan-EO» Yntymaqtastyq keńesiniń otyrysy: Qaırat Ábdirahmanov birqatar kezdesýler ótkizdi
ASTANA. QazAqparat - Brıýsselde «Qazaqstan-EO» Yntymaqtastyq keńesiniń otyrysy aıasynda QR Syrtqy ister mınıstri Qaırat Ábdirahmanov birqatar ekijaqty kezdesýler ótkizdi, dep habarlaıdy vedomstvonyń baspasóz qyzmeti.
Eýroodaqtyń syrtqy ister jáne qaýipsizdik saıasaty jónindegi joǵary ókili Federıka Mogerınımen áńgimelesý barysynda taraptar qazirgi halyqaralyq jáne óńirlik máseleler, Aýǵanstandaǵy jaǵdaı jáne Ortalyq Azııa men Eýroodaq arasyndaǵy yntymaqtastyq boıynsha pikir almasty.
Eýropalyq Komıssııanyń halyqaralyq yntymaqtastyq jáne damý jónindegi komıssary Neven Mımıtsamen kezdesýi Ortalyq Azııadaǵy EO-nyństrategııasyn jańartý úderisin talqylaýǵa arnaldy.
Q.Ábdirahmanov Qazaqstannyń bizdiń óńirimizdiń barlyq elderiniń múddelerin eskere otyryp, onyń eń joǵary tıimdiligin qamtamasyz etý úshin jańa qujat ázirleýge belsendi túrde qatysýǵa daıyn ekendigin atap ótti. Taraptardyń Aýǵanstanǵa, onyń ishinde bilim berý salasyna kómek kórsetýdegi yntymaqtastyǵyna erekshe kóńil bólindi.
Mınıstr, sondaı-aq, Eýropalyq Parlamenttiń Ortalyq Azııa boıynsha delegatsııasynyń Iveta Grıgýle bastaǵan top múshelerimen suhbattasty.
Syrtqy saıasat vedomstvosy basshysy Belgııa Premer-mınıstriniń orynbasary, Syrtqy jáne eýropalyq ister mınıstri Dıde Reınderspen kezdesý barysynda ekijaqty saýda-ekonomıkalyq yntymaqtastyqty damytýdyń keleshegin, Qazaqstanǵa Belgııadan ınvestıtsııalar men tehnologııalardy tartý máselesin talqylady. Belgııany BUU Qaýipsizdik keńesiniń 2019-2020 jyldarǵa kandıdat retinde usynýyna baılanysty, Q.Ábdirahmanov Qazaqstannyń BUU Qaýipsizdik Keńesiniń múshesi jáne Prezıdent N.Nazarbaevtyń bitimgerlik bastamalary jónindegi is-qımyldary týraly baıandady.
Sondaı-aq, Q.Ábdirahmanov Brıýsselde Maltanyń syrtqy ister mınıstri Karmelo Abelamen jáne Irlandııanyń syrtqy ister mınıstri Saımon Kovenımen kezdesti.
