Qazaqstan EO-pen vızalyq rejım boıynsha stýdentter úshin konsýldyq alymdardy azaıtýǵa kúsh salady
ASTANA. QazAqparat - Qazaqstan EO-pen vızalyq rejımdi jeńildetý aıasynda stýdentter úshin konsýldyq alymdardy azaıtýǵa kúsh salady. Bul týraly búgin Senattyń Halyqaralyq qatynastar, qorǵanys jáne qaýipsizdik komıtetiniń keńeıtilgen otyrysynda «Bir jaǵynan Qazaqstan Respýblıkasy men ekinshi jaǵynan Eýropalyq Odaqtyń jáne oǵan múshe memleketteriniń arasyndaǵy keńeıtilgen áriptestik pen yntymaqtastyq týraly kelisimdi ratıfıkatsııalaý týraly» zań jobasyn talqylaý barysynda málim boldy.
«Qazaqstan men EO osy kelisim aıasynda vızalyq rejımdi jeńildetý týraly kelisimdi jasaýǵa da ýaǵdalasty. Bunymen qosa, Qazaqstan men EO arasyndaǵy adamdardyń readmıssııasy týraly kelisim de qaralýda. Bul rette EO-pen vızalyq dıalog jandanyp, onyń qorytyndysy boıynsha EO Komıssııasy vızalyq rejımdi jeńildetý boıynsha kelisimdi bastaýǵa arnaıy mandat alady», - dedi QR Syrtqy ister mınıstriniń orynbasary Roman Vasılenko.
Onyń aıtýynsha, qazirdiń ózinde elimizde Qazaqstan azamattary úshin EO vızalyq rejımdi jeńildetýge baǵyttalǵan sharalar qolǵa alyna bastaǵan. Bul rette zańnamalyq ózgerister qaralyp otyr. «Biz vızalyq rejımdi alyp tastaý týraly másele qoıyp otyrǵan joqpyz. Al jeńildetýge kelsek, qazir bizdiń azamattarymyz shengen vızasyn rásimdeýde biraz qıynshylyq kórip otyrǵany belgili. Al jeńildetilgen tártip boıynsha talap etilip, suralatyn birqatar qujattardy qysqartý qarastyrylýda», - dedi R. Vasılenko.
Syrtqy ister mınıstrligi Konsýldyq qyzmet departamentiniń dırektory Ardaq Mádıevtiń aıtýynsha, Qazaqstan men EO arasyndaǵy kelisim kúshine engennen keıingi kelesi qadam - vızalyq rejımdi ońaılatý. «Biz byltyr EO talaptaryna sáıkes vıza jáne kóshi-qon saıasaty boıynsha ulttyq zańnamany úılestirý boıynsha jumystardy qolǵa aldyq. Tutastaı alǵanda, bul asa kúrdeli protses, degenmen EO protsedýrasynan ótýimiz kerek. Bul rette aldymen vızalyq jeńildikterdi qamtıtyn «visa facilitation» statýsyn alýǵa tıispiz. Sonyń ishinde vızalyq jeńldetý sharalary negizinen suralatyn qujattardy qysqartý men azamattardyń belgili bir sanattaryn, balalar men stýdentterdi vızalyq alymnan bosatýdy qamtıdy. Qazir stýdentter de, balalar da vıza rásimdeý barysynda baj retinde tóleıtin konsýldyq alymy tym joǵary», - dedi A. Mádıev.
Onyń aıtýnysha, visa facilitation statýsynan keıin Qazaqstan visa free mártebesin ıelenýge qatysty qadamdarǵa barady.
«Jalpy eýropalyq áriptester tarapynan bizge degen túsinisýshilik bar. Qazaqstanda EO-qa qatysty kóshi-qon qaýipteri joq dese de bolady. Osy baǵyttaǵy jumysty jalǵastyratyn bolamyz», - dedi A. Mádıev.
