Qazaqstan EO-nyń mańyzdy ekonomıkalyq seriktesine aınalyp keledi – eýrodepýtat
Qarasha aıy Eýroparlament depýtattary men qazaqstandyq áriptester arasynda saıası baılanystarǵa toly boldy. Brıýsselde Qazaqstan Respýblıkasy – Eýropalyq Odaq Parlamenttik yntymaqtastyq komıtetiniń 20-shy otyrysy ótti. Sondaı-aq eýropalyq depýtattar «Ortalyq Azııa elderi áıelderiniń dıalogy» aıasynda Qazaqstan Parlamentiniń bir top áıel depýtattarymen kezdesti. Osy is-sharalar barysynd Kazinform agenttiginiń menshikti tilshisi Eýroparlament depýtattarynyń EO men Qazaqstan arasyndaǵy qarym-qatynasy týraly pikirin surady.
«Qazir Eýropa qıyn kezeńdi bastan ótkerip jatyr, atap aıtqanda Ýkraınadaǵy oqıǵalar men Taıaý Shyǵystaǵy jaǵdaıǵa baılanysty. Jalpy dúnıe júzinde ekonomıkalyq jaǵdaı kúrdeli bolyp tur. Energııa kózderiniń baǵasy ósip, jańa ekonomıkalyq baılanystar men úlgiler qalyptasyp jatyr. Eýropalyq Odaq Reseımen ekonomıkalyq qarym-qatynasyn úzýge májbúr boldy. Bizge óz saýdamyzdy ártaraptandyrýǵa týra keledi. Ekinshi jaǵynan, biz Qytaı sııaqty basqa memleketterge qatty táýeldi bolǵymyz kelmeıdi. Osynyń aıasynda biz Ortalyq Azııa memleketterinde, eń aldymen Qazaqstanda ózimiz úshin mańyzdy saýda seriktesterin taba alamyz dep oılaımyn. Álemde geosaıası jaǵdaıdyń ózgerip jatqanyn taǵy da atap ótkim keledi. Bul rette Qazaqstannyń kópvektorly syrtqy saıasatty ustanatynyn bilemiz. Biz EO-da Qazaqstanmen baılanysymyzdy keńeıtýge nıettimiz. Eń aldymen, saýda, ekonomıka, energııa ımporty salasynda», - dedi Eýroparlament depýtaty Fransısko Hose Mıllan Mon.
Lıtvalyq Eýroparlament depýtaty Rasa ıÝknıavıchene Qazaqstan geografııalyq turǵydan Eýropaǵa jatpaǵanymen, EO-ǵa jaqyn el dep esepteıdi.
«Keńes Odaǵy jaýlap alǵan Lıtvada dúnıege kelgen adam retinde men Qazaqstan halqy keıbir eýropalyq memleketterge qaraǵanda keıde bizge, eýropalyqtarǵa áldeqaıda jaqyn dep esepteımin. Stalındik qýǵyn-súrgin kezinde Qazaqstanǵa jer aýdarylǵan adamdarǵa oń kózqaraspen qaraıtyndary úshin qazaq halqyna degen qurmetim joǵary. Sol sebepti Qazaqstanmen kóbirek birge jumys isteý kerektigin túsinemin», - dep atap ótti Eýroparlament depýtaty.